މި އަހަރުގެ ޝައްވާލު މަހުގެ ހަނދު ސާބިތުކުރުމަށްޓަކައި، ހަނދު ފެނިއްޖެ ނަމަ އެކަން އެންގުމަށާއި ހެކިބަސް ދިނުމަށް ކުރަންޖެހޭ ދަތުރުފަތުރުގެ ޚަރަދުތައް ހަމަޖައްސައިދޭނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
މިކަމާ ގުޅިގެން ޑީޖީއޭއިން ބުނެފައިވަނީ، ހަނދު ފެނިގެން ހެކިބަސް ދޭން ބޭނުންވާ ފަރާތްތަކުން ހެކިބަސް ދޭންޖެހޭނީ، މާލޭގައި ނަމަ ކޯޓެއްގެ ޣާޒީއެއްގެ ކުރިފުޅުމަތީގައި ކަމަށާއި، ރަށެއްގައި ނަމަ، އެ ރަށެއްގެ މެޖިސްޓްރޭޓް ކޯޓުގެ މެޖިސްޓްރޭޓެއްގެ ކުރިފުޅުމަތީގައި ކަމަށެވެ. މީގެ އިތުރުން މެޖިސްޓްރޭޓަކު ނެތް ރަށެއްގައި ނަމަ، އެ ވަގުތަކު އެ ރަށެއްގެ މެޖިސްޓްރޭޓް ކޯޓު ހިންގުމާ ހަވާލުވެ ހުންނެވި މެޖިސްޓްރޭޓެއްގެ ކުރިފުޅުމަތީގައި ހެކިބަސް ދެވޭނެ ކަމަށް ޑީޖޭއޭއިން ވަނީ ބުނެފައެވެ.
ހަނދު ފެނިގެން އެކަމާ ބެހޭ މަޢުލޫމާތު ޙިއްޞާކުރާއިރު، ހަނދު ހުރި އުސްމިނާއި މިސްރާބު ފަދަ މުހިންމު މަޢުލޫމާތުތައް ފޯރުކޮށްދޭންޖެހޭނެ ކަމަށް ޑީޖީއޭއިން ވަނީ ބުނެފައެވެ.
ޝައްވާލު މަހުގެ ހަނދުގެ މައްސަލައިގައި ވަކި ގޮތެއް ނިމެންދެން، މާޗު 18 ވާ ބުދަ ދުވަހުގެ ހަވީރު 17:30 އިން ފެށިގެން ޑީޖޭއޭގެ އިތުރުން، ރަށްރަށުގެ މެޖިސްޓްރޭޓް ކޯޓުތަކާއި، ރަށު ކައުންސިލް އިދާރާތަކާއި އަތޮޅު ކައުންސިލް އިދާރާތައް ހުޅުވާފައި ހުންނާނެއެވެ. އެހެންކަމުން، ހަނދު ދުށް މީހަކު ނުވަތަ ބަޔަކު ވީ އެންމެ އަވަހަކަށް ހަނދާ ބެހޭ މަޢުލޫމާތު ޙިއްޞާކުރުމަށް ޑީޖީއޭއިން ވަނީއެދިފައެވެ.
ޝައްވާލު މަހުގެ ހަނދު ބެލުން އޮންނާނީ އަންނަ ހަފްތާގެ ބުދަ ދުވަހުއެވެ.
