ބަލިމީހުންގެ ނަމުގައި ހިންގާ ”މެޑިކަލް ސްކޭމް“ ތަކަށް ސަމާލުވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.
އެންޓިސްކޭމް މައްސަލަތަކަށް ޚާއްޞަކޮށް ފުލުހުން ހިންގާ ފޭސްބުކް ޕޭޖްގައި ހިއްސާކުރި ޕޯސްޓެއްގައި ބުނީ ފަހަކަށް އައިސް ފޭސްބުކްގައި ބަލިމީހުންގެ ފޮޓޯ ބޭނުންކޮށްގެން މެޑިކަލް އެހީއަށް އެދި ކުރާ ޕޯސްޓްތައް ވަނީ ވަރަށް ބޮޑަށް އިތުރުވެފައިވާކަމަށެވެ. އަދި މީގެ ތެރެއިން ގިނަ ޕޯސްޓްތަކަކީ މަކަރާއި ހީލަތުން ފައިސާ ހޯދުމަށް ހިންގާ ސްކޭމްތަކެއް ކަމަށްވެސް ފުލުހުން ވަނީ ބުނެފައެވެ.
އާންމުން ހޭލުންތެރި ކުރުވުމުގެ ގޮތުން ފުލުހުން ވަނީ މިފަދައިން ސްކޭމްތައް ޖައްސާމީހުން ބޭނުންކުރާ އުކުޅުތައްވެސް ތަފްސީލީ ގޮތެއްގައި ހިއްސާކުރައްވާފައެވެ.
ފުލުހުން ހާމަކޮށްފައިވާ ސްކޭމަރުންގެ އުކުޅުތައް:
• ފޮޓޯ ވަގަށް ނެގުން: އިންޓަނެޓުންނާއި ރާއްޖޭން ބޭރުގެ ވެބްސައިޓްތަކުން ބަލިމީހުންގެ ފޮޓޯ ނަގައިގެން ބޭނުންކުރުން.
• އިހުސާސްތަކާ ކުޅެލުން: ކުޑަކުދިންނާއި ބޮޑެތި ބަލިތަކުގެ ވާހަކަ ދައްކައިގެން މީހުންގެ ހަމްދަރުދީ ހޯދުން.
• ފޯނު ކޯލް ބްލޮކްކުރުން: ޕޯސްޓްގައިވާ ނަންބަރަށް ގުޅުމުން ފޯނު ނުނެގުން ނަމަވެސް މެސެޖަށް ޖަވާބުދިނުން.
ފުލުހުން ބުނީ މިކަމުން ރައްކާތެރިވުމުގެ ގޮތުން އެފަދަ ޕޯސްޓެއް ފެނިއްޖެނަމަ، އެ ނަންބަރަށް ގުޅައިގެން މުޢާމަލާތުން ޔަޤީންކުރުމަށެވެ. އަދި އެފަދަ ގޮތަކަށް ފައިސާ ފޮނުވުމުގެ ކުރިން އެ ނަންބަރަށް ގުޅައި ވާހަކަދައްކާ އިތުރަށް މިކަން ކަށަވަރު ކުރަން ސަމާލުކަން ދިނުމަށްވެސް ފުލުހުން އެދިފައިވެއެވެ.
މީގެ އިތުރުން އެފަދަ ޕޯސްޓް ރިސާޗް ކޮށް ފޮޓޯއަކީ ސައްހަ ފޮޓޯއެއްތޯ ބެލުމަށްވެސް ފުލުހުން ވަނީ އެދިފައެވެ. އެގޮތުން (Google Reverse Image Search) ބޭނުންކުރެވިދާނެ ކަމަށް ފުލުހުން ވަނީ ބުނެފައެވެ.
ތިންވަނަ ކަމަކަށް ފުލުހުންބުނީ އެފަދަ ޕޯސްޓްތަކުގެ ޞައްޚަކަން ކަށަވަރުނުކޮށް ޝެއަރ ނުކުރުމަށެވެ. އެގޮތުން ޔަޤީންނުވާ ޕޯސްޓްތައް ޝެއަރ ކުރުމަކީ އިތުރު ބަޔަކު މީގެ މަޅީގައި ޖެހުމަށް ދެވޭ ދަޢުވަތެއް ކަމަށް ފުލުހުން ވަނީ ބުނެފައެވެ.
”ތިބާގެ ދީލަތި އެހީ، ކުށްވެރިންގެ އަތަށް ދިޔަ ނުދެއްވާށެވެ“ ފުލުހުން ބުނެފައިވެއެވެ.
ސްކޭމްތަކަށް ހޭލުންތެރިވުމަށް އެދި ކޮށްފައިވާ އެ ޕޯސްޓާ އެކު ފުލުހުން ވަނީ މީހަކު ހިންގާ ސްކޭމެއްގެ ސްކްރީންޝޮޓުތަކެއް ވެސް ހިއްސާކޮށްފަ އެވެ. އޭގައި ވަނީ އޭނާގެ އުމުރުން ތިން އަހަރުގެ ބަލި ކުއްޖަކު ހުންނަ ކަމަށާއި އޭނާއަކީ އެކަނިވެރި މައެއް ކަމަށް ބުނެފަ އެވެ. އަދި ޕޯސްޓުގައި ވަނީ ނަމާއި އައިޑީކާޑު ނަމްބަރެއްގެ އިތުރުން، އޭނާއަކީ ނޭވާޔަށް އުނދަގޫވާ ބައްޔެއް ތަހައްމަލުކުރަމުން އަންނަ މީހެއް ކަމަށް ބުނެފަ އެވެ.
މީހުންނަށް އެހީތެރިވުމުގެ މާތްކަމާ ގުޅޭ ދީނީ ވާހަކަތަކަކާއި ހަދީސްތަކެއް ވެސް އެ ޕޯސްޓުގައިވާއިރު އެހީތެރިވުމުގެ ޤާބިލުކަމެއް ނެތް ނަމަ، ޕޯސްޓު ޝެއާކުރަން ވެސް އެދިފައިވެ އެވެ.
މީގެ ކުރިން ފުލުހުން ވަނީ ”ދީނުގެ މަގު“ ގެ ނަމުގައި ހިންގަމުން އަންނަ ޕޭޖަކުން ވެސް ސްކޭމް ހިންގާތީ އެކަން ވެސް އާންމުންގެ ސަމާލުކަމަށް ގެނެސްފަ އެވެ. ބޮޑެތި ބަލިތަކާ ގުޅުވައި އެހީގެ ޕޯސްޓުތައް ކުރާ އެ ޕޭޖަކީ އެތައް ހާސް ދިވެހިންނެއް ފޮލޯކުރާ ޕޭޖެކެވެ. އަދި އެއަށް ކުރާ ޕޯސްޓުތައް ވެސް އެތައް ސަތޭކަ ބަޔަކު ޝެއާކޮށްފައި ހުރެ އެވެ.
