ތަރާވީޙް ގަޑީގައި ކޮލެޖުތަކުން ކްލާސްތައް ނުނަގަން އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު އެދިވަޑައިގެންފިއެވެ.
މިނިސްޓަރު ޝަހީމް މިގޮތަށް އެދިވަޑައިގެންފައިވަނީ، ރަމަޟާން މަސް ފެށުނީއްސުރެ ތަރާވީޙް ނަމާދު ވަގުތާ ދިމާކޮށް ބައެއް ކޮލެޖުތަކުން ކްލާސްތައް ބާއްވަމުން އަންނަ މައްސަލަ އެ ކޮލެޖުތަކުން ކިޔަވާ ދަރިވަރުން އެމަނިކުފާނުގެ ސަމާލުކަމަށް ގެނައުމާ ގުޅިގެންނެވެ.
މި މައްސަލަ ފާހަގަކުރައްވަމުން މިނިސްޓަރު ޝަހީމް ފޭސްބުކްގައި މިއަދު ޙިއްޞާކުރެއްވި ޕޯސްޓެއްގައި ވިދާޅުވެފައިވަނީ، ބައެއް ކޮލެޖްތަކުން ރަމަޟާން މަހުގެ ފަހުދިހައިގެ ދުވަސްތަކުގައިވެސް ތަރާވީޙް ނަމާދު ގަޑީގައި ރޭގަނޑު ކްލާސްތައް ޝެޑިއުލްކުރާތީ ބައެއް ދަރިވަރުން ޝަކުވާ ހުށަހަޅަމުން އަންނަ ކަމަށެވެ.
މިނިސްޓަރު ޙިއްޞާކުރެއްވި ޕޯސްޓުގައި އެކަން އެގޮތަށް ކުރަނީ ކޮން ކޮލެޖުތަކަކުން ކަމެއް ހާމަކުރައްވައިފައެއްނުވެއެވެ.
މި މައްސަލައާ ގުޅިގެން މިނިސްޓަރު ޝަހީމް އިތުރަށް ވިދާޅުވީ، އެފަދަ ގޮތަކަށް ކްލާސްތައް އިންތިޒާމު ކުރާ ކޮލެޖްތަކުން ތަރާވީޙް ނަމާދަށް ހުރަސް ނޭޅޭ ގޮތައް ކްލާސްތައް ކުރިއަށް ގެންދިއުން ވަރަށް މުހިންމު ކަމުގައި ދެކެވަޑައިގަންނަވާ ކަމަށެވެ.
ތަރާވީޙް ނަމާދާ ދިމާކޮށް ބައެއް ކޮލެޖުތަކުން ކްލާސްތައް ބާއްވަމުން އަންނަކަން މިނިސްޓަރު ޝަހީމްގެ ސަމާލުކަމަށް އައިސްފައިވާއިރު ފާހަގަކޮށްލަންޖެހޭ ކަމަކީ، މާލޭގެ ގިނަ މިސްކިތްތަކުގައި ތަރާވީޙް ނަމާދުކޮށް ނިމެނީވެސް ރޭގަނޑު 21:00 ގައެވެ.
