ނިމިދިޔަ އެމްޑީޕީގެ ސަރުކާރުގެ 5 އަހަރުގައި މާލޭ ސިޓީއަށް ނުގެނެވުނު ބަދަލު ގެނައުމަށް ވެރިކަން އަލުން އެމްޑީޕީއަށް ދޭންޖެހޭ ކަމަށް ކުރީގެ ރައީސް އިބްރާހިމް މުޙައްމަދު ޞާލިޙް (އިބޫ) ވިދާޅުވެއްޖެއެވެ.
އިބޫ މި މޭރުމުން ވިދާޅުވީ ރޭ އާޓިފިޝަލް ބީޗުގައި އެމްޑީޕީގެ މާލެ މެނިފެސްޓޯ އިފްތިތާޙުކުރުމަށް ބޭއްވި ޖަލްސާގައެވެ. އިބޫ ވިދާޅުވީ، މާލެއަށް ދިމާވެފައިވާ މައްސަލަތަކަކީ ކުއްލިއަކަށް ދިމާވި މައްސަލަތަކެއް ނޫންކަމަށާއި، އެއީ ވަރަށް ގިނަ ދުވަހުން ”އެއްވަމުން އެއްވަމުން“ ދިމާވެފައި ހުރި ބޮޑެތި މައްސަލަތަކެއް ކަމަށެވެ.
އެ މައްސަލަތަކަކީ ހަމައެކަނި ސިޓީ ކައުންސިލަށް ޙައްލު ހޯދައިދެވޭނެ މައްސަލަތަކެއް ނޫންކަން ފާހަގަކުރައްވަމުން އިބޫ ވިދާޅުވީ، އެ މައްސަލަތައް ޙައްލުކުރެވޭނީ އެމްޑީޕީއަށް ވެރިކަން ޙަވާލުކޮށްގެން ކަމަށެވެ. އަދި މި މައްސަލަތަކަކީ ޙައްލުކުރަން އުނދަގޫ މައްސަލަތަކެއް ކަމަށާއި އެއީ އެއް ދުވަހަކުން ނުވަތަ ދެ ދުވަހަކުން ޙައްލުކުރެވޭނެ ކަންކަމެއްނޫން ކަމަށް އިބޫ ވިދާޅުވިއެވެ.
”މިއީ ހަމައެކަނި ސިޓީ ކައުންސިލަށް ޙައްލު ކުރެވޭނެ ކަމެއްނޫން. މި ކަމަށް ޙައްލު ހޯދައިދޭނެ ވެރިކަމެއް ގެނެސްގެން ނޫނީ މާލެއަކަށް ޙައްލެއް ނުހޯދޭނެ. އަޅުގަނޑުމެން ޖެހޭނެ 2028 ވަނަ އަހަރުގައި އެ ބަދަލު ގެންނަން،“ – އިބޫ ވިދާޅުވިއެވެ.
އިބޫ ވިދާޅުވީ، މާލެއަށް ދިމާވެފައިވާ އެންމެ ބޮޑު މައްސަލައަކީ ރާއްޖޭގެ އެކި ކަންކޮޅުތަކުން މާލެއަށް ދިރިއުޅުން ބަދަލުކުރާ މީހުންގެ އަދަދު އިތުރުވުން ކަމަށާއި، މި މައްސަލަ ޙައްލުކުރެވޭނީ އެމްޑީޕީން ގެންގުޅޭ ލާމަރުކަޒީ ނިޒާމާ އެއްގޮތަށް ކަންކަން ކޮށްގެން ކަމަށެވެ. މީގެ އިތުރުން އިބޫ ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ގުޅޭގޮތުންވެސް ޙަޤީޤަތާ ޚިލާފު ވާހަކަތަކެއް ދައްކަވައިފައެވެ. އެގޮތުން ރައީސް ޑރ. މުޢިއްޒުއާއި އެމަނިކުފާނުގެ ޓީމަކީ ލާމަރުކަޒީ ނިޒާމަށް އެތަކެއް ގެއްލުމެއް ދީފައިވާ ބައެއް ކަމަށް ވިދާޅުވެ އެމަނިކުފާނުގެ އިސްތަށިފުޅުގައި އިބޫ ވަނީ ދޮގު ތުޙުމަތުތަކެއް އަޅުއްވައިފައެވެ.
ވެރިކަމަށް ފެންބޮވައިގަނެފައިވާކަން އަންގައިދޭ ގޮތަށް ދެއްކި ވާހަކަތަކާއި، ރައީސް ޑރ. މުޢިއްޒުއާ ގުޅުވައިގެން އިބޫ ދެއްކި ދޮގު ވާހަކަތަކުގެ ސަބަބުން ގިނަ ބަޔަކު އަންނަނީ އޭނާއަށް ވަރަށް ބޮޑަށް ފާޑުކިޔަމުންނެވެ. އެގޮތުން ”ނުކިޔަވާ މީހުންނަށް ވެރިކަން އެއީ ކޯއްޗެއްކަން ނޭނގޭކަން އިބްރާހިމް މުޙައްމަދު ޞާލިޙް ވަނީ ސާބިތުކޮށްދީފަ ކަމަށާއި، ފަސް އަހަރުގެ މުއްދަތެއް ދެވުނު ނަމަވެސް، އެ މުއްދަތުގެ ތެރޭގައި ނުގެނައި ބަދަލެއް ފަހަކުންވެސް ނުގެންނާނެ ކަމަށް ބުނެ ގިނަ ބަޔަކު ވަނީ އިބޫގެ ވާހަކަތަކަށް ވަރަށް ބޮޑަށް ފާޑުކިޔައިފައެވެ.
