މިއަދުން ފެށިގެން ރަމަޝާން މަހުގެ ފަހުދިހައެއްގެ ދުވަސްތައް ނިމެންދެން، ދިހަ ދުވަހުގެ މުއްދަތަކަށް ސަރުކާރު ބަންދުކޮށްފިއެވެ.
ކޮންމެ އަހަރެއްގެވެސް ރަމަޟާން މަހުގެ ފަހުދިހައިގެ ދުވަސްތަކަކީ ސަރުކާރު ބަންދު ދުވަސްތަކެއްގެ ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައެޅުއްވީ، ދީނީ ކަންކަމަށް ޢާންމުންގެ ހިތްތަކުގައި ލޯބި ޖައްސައި، އަޅުކަންތަކަށް އިސްކަން ދިނުމަށް ފުރުޞަތު ދިނުމަށެވެ.
މިކަމަކީ ރައީސް ޑރ. މުޢިއްޒުގެ ރިޔާސީ ވަޢުދުފުޅެއްވެސްމެއެވެ. އެމަނިކުފާނުގެ ވަޢުދުފުޅާ އެއްގޮތަށް 2024 ވަނަ އަހަރުން ފެށިގެން، ރަމަޟާން މަހުގެ ފަހުދިހައިގެ ދުވަސްތަކަކީ ސަރުކާރު ބަންދު ދުވަސްތަކެއް ކަމަށް ކަނޑައަޅައި، އެ ދުވަސްތައް ބަންދުކުރަން ވަނީ ފަށައިފައެވެ.
ރަމަޟާން މަހުގެ ފަހުދިހައިގެ ދުވަސްތަކުގައި، ސަރުކާރުގެ އެކިއެކި މުއައްސަސާތަކުން ރައްޔިތުންނަށް ކޮންމެހެން ފޯރުކޮށްދޭންޖެހޭ ޚިދުމަތްތައް، އެ މުއައްސަސާތަކުން ކަނޑައަޅާ ގޮތެއްގެ މަތިން ދިނުމުގެ އިންތިޒާމު، އެ މުއައްސަސާއަކުން ހަމަޖެއްސުމަށް ރައީސުލްޖުމްހޫރިއްޔާގެ އޮފީހުން މީގެ ކުރިން ވަނީ އަންގައިފައެވެ.
އެހެންކަމުން މި ބަންދު ދުވަސްތަކުގައިވެސް ރައްޔިތުންނަށް ބޭނުންވާ އަސާސީ ޚިދުމަތްތައް ފަސޭހަކަމާއެކު ލިބޭނެ ކަމަށް ރައީސުލްޖުމްހޫރިއްޔާގެ އޮފީހުން ވަނީ ބުނެފައެވެ.
