ސާފުތާހިރުކަން ކުޑަކޮށް ކާބޯތަކެތި ތައްޔާރުކުރުމުގެ ސަބަބުން ”ބިލެތްމާ ޓޭސްޓީ“ ގެ ކާބޯތަކެތި ވިއްކައި، އެ ތަކެތި ބޭނުންކުރުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފިއެވެ.
މިކަމާ ގުޅިގެން އެމްއެފްޑީއޭއިން ނެރެފައިވާ އިޢުލާނެއްގައި ބުނެފައިވަނީ، އެ އޮތޯރިޓީއަށް ލިބިފައިވާ ޝަކުވާއަކާއި ގުޅިގެން، ތެލުލި ފަތް، ކޮށިމަސް، ކުޅިކާޖާ އަދި ރިހާކުރު ފަދަ ބަންދުކުރި ކާބޯތަކެތި އުފައްދާ ”ބިލެތްމާ ޓޭސްޓީ“ ބަލައިފާސްކުރި އިރު، އެތަނަކީ ޢާންމު ސާފުތާހިރުކަން ދަށް އަދި ކާބޯތަކެތީގެ މިންގަނޑުތަކަށް ނުފެތޭ ތަނެއްކަން ފާހަގަކުރެވިފައިވާ ކަމަށެވެ.
— MFDA (@MFDA_mv) March 8, 2026
އެހެންކަމުން އެތަނުގައި ކުރަމުން އައި މަސައްކަތްތައް ވަގުތުން ހުއްޓާލުމަށް ”ބިލެތްމާ ޓޭސްޓީ“ އަށް މިހާރު އަންގާފައިވާނެ ކަމަށް އެމްއެފްޑީއޭއިން ވަނީ ބުނެފައެވެ. މީގެ އިތުރުން ކާބޯތަކެތި ރައްކާތެރިކުރުމުގެ ޤާނޫނުގެ ދަށުން، ކާބޯތަކެތީގެ ޚިދުމަތްދޭ ހުރިހާ ތަނަކީ އެމްއެފްޑީއޭގައި ރަޖިސްޓްރީކުރަން ލާޒިމު ތަންތަނަށް ވީނަމަވެސް، ”ބިލެތްމާ ޓޭސްޓީ“ އަކީ އެ އޮތޯރިޓީގައި ރަޖިސްޓްރީކޮށްގެން ހިންގާ ތަނެއް ނޫންކަމަށް އެމްއެފްޑީއޭއިން ވަނީ ބުނެފައެވެ.
އެހެންކަމުން، ރައްކާތެރިކަމުގެ ފިޔަވަޅެއްގެ ގޮތުން ”ބިލެތްމާ ޓޭސްޓީ“ އިން އުފައްދާ އެއްވެސް ބާވަތެއްގެ ކާބޯތަކެތި ބޭނުން ނުކުރުމަށް އަދި ނުވިއްކުމަށް އަންގާކަމަށް އެމްއެފްޑީއޭއިން ވަނީ އިތުރަށް ބުނެފައެވެ.
މިކަމާ ގުޅޭގޮތުން އިތުރަށް މަޢުލޫމާތު ސާފުކުރަން ބޭނުންވާ ފަރާތްތަކުން އެމްއެފްޑީއޭގެ ނަންބަރު 7603204 އަށް ގުޅައި މަޢުލޫމާތު ސާފުކުރުމަށް އެ އޮތޯރިޓީން ވަނީ އެދިފައެވެ.
