މިދިޔަ ހޮނިހިރު ދުވަހުގެރޭ ޕީއެންސީން ބޭއްވި ޖަލްސާގައި ”އެފޮޓޯފުޅު“ގެ ވާހަކައަށް ޢިޝާރާތް ކުރައްވާ ރައީސް ޑރ. މުޢިއްޒު ދެއްކެވީ ތެދުވާހަކަފުޅެއްކަމަށް ޕީއެންސީގެ ނައިބު ރައީސް އަދި މަޖްލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
ރައީސް އެރޭގެ ޖަލްސާގައި ”އެފޮޓޯގެ“ ވާހަކަ ތަފްސީލް ކޮށްދެއްވި ވީޑިއޯކޮޅާއެކު ޝުޖާއު ކުރެއްވި ޕޯސްޓެއްގައި ވިދާޅުވީ ރައީށް އެ ވިދާޅުވީ ވަރަށް ބޮޑު ތެދުފުޅެއް ކަމަށާއި، އޭނާއަކީ އެ ފޮޓޯގެ މައްސަލައިގައި ކުށްވެރިވިމީހެއް ކަމަށެވެ.
”ވަރަށް ބޮޑު ތެދުފުޅެއް ރައީސް ތިޔަ ވިދާޅުވީ.އަޅުގަނޑުމެން މީ ތިޔަ ވިދާޅުވާ ފޮޓޯ ފުޅުގެ މައްސަލާގައި ކުއްވެރިވި މީހުން. ރިޔާސީ ކެނޑިޑޭޓާއި ރަނިންގ މޭޓޫގެ ފޮޓޯފުޅުގެ މެދަށް ރައީސް ޔާމީންގެ ފޮޓޯފުޅު ނުލާގެން އަޅުގަނޑުމެން މީ އަނިޔާވެރިން ކަމަށް ވީމީހުން“ޝުޖާއު ވިދާޅުވިއެވެ.
މިއާއިއެކު ޝުޖާއު ވިދާޅުވީ ފޮޓޯގަނޑު ކަންތަކުގައި ޔާމީން ގެންގުޅުއްވީ ހިޔަޅު ވިސްނުމެއް ކަމަށާޢި، އެކަން އެގޮތަށް ކުރުވީ މިއަދު އެވާހަކަތައް އެ މޭރުމުން ދައްކަވަން ކަމަށެވެ.
”މާފަހުން މިއެގުނީ އެކަމުގައިވެސް ހިޔަޅު ވިސްނުމެއް ގެންގުޅުއްވި ކަން.ބޭނުންފުޅުވީ ފަހުން ވިދާޅުވާން ތިމަން މަނިކުފާނުގެ ފޮޓޯ ޖަހާގެނޭ ހޮވުނީ!ކީކޭތޯ ދަންނަވާނީ؟އޭރުވެސް އަޅުގަނޑުމެންގެ ނިޔަތް ސާފު“
ވަރަށް ބޮޑު ތެދުފުޅެއް ރައީސް ތިޔަ ވިދާޅުވީ.އަޅުގަނޑުމެން މީ ތިޔަ ވިދާޅުވާ ފޮޓޯ ފުޅުގެ މައްސަލާގައި ކުއްވެރިވި މީހުން.ރިޔާސީ ކެނޑިޑޭޓާއި ރަނިންގ މޭޓޫގެ ފޮޓޯފުޅުގެ މެދަށް ރައީސް ޔާމީންގެ ފޮޓޯފުޅު ނުލާގެން އަޅުގަނޑުމެން މީ އަނިޔާވެރިން ކަމަށް ވީމީހުން.މާފަހުން މިއެގުނީ… pic.twitter.com/K8XPuhM0a1
— Ibrahim Shujau (@IbrahimShujaau) March 8, 2026
ޝުޖާއު ވިދާޅުވީ އޭނާ އަބަދުވެސް ޤަބޫލުކުރީ ކެމްޕޭނު ޕޯސްޓަރު ތައްޔާރު ކުރާނީ ވާދަކުރައްވާ ބޭފުޅުން ހިމަނާގެންކަމަށާއި، އޭރު އެވިސްނުން ގެންގުޅުމުން ގޯސްވިކަމަށެވެ. އެހެންނަމަވެސް މިއަދުގެ ޙާލަތު ބަދަލުވެއްޖެ ކަމަށާއި މިއަދު އަމިއްލަ އެދުމެއް ނެތި ހެޔޮ ނިޔަތުގައި ޕާޓީ ޕްރޮމޯޓްކޮށް ޕާޓީ ނިޒާމުގެ ވެެރިކަމެއް ރައީސް މުޢިއްޒު ކުރައްވަމުން ގެންދަވާކަން އިޙުސާސް ވާކަމަށް ޝުޖާއު ވިދާޅުވިއެވެ.
ރައީސް މުޢިއްޒު ވިދާޅުވީ އެގޮތަށް ފޮޓޯ ޖެއްސެވުމަކީ މީގެކުރިން މަޖުބޫރުކޮށްގެން ކުރުވި ކަމެއްކަމަށާއި، މި ކެމްޕޭނަށްވެސް ޕާޓީގެ ލީޑަރޝިޕުން ރައީސްގެ ފޮޓޯ ޖައްސަވަން އެދިވަޑައިގެންނެވި ކަމަށެވެ. އެހެންނަމަވެސް އެމަނިކުފާނު އެގޮތަށް އެދިވަޑައިނުގެންނެވިކަމާއި އެކަމުގެ ތަފްސީލް ވިދާޅުވެ ދެއްވިއެވެ.
މިއާއިއެކު ރައީސް ވިދާޅުވީ ޕީއެންސީއަކީ ޕާޓީއެއް ކަމަށާއި މ ވަކިމީހެއްގެ އެއްޗެއްނޫން ކަމަށާޢި، ޕީއެންސީއަކީ އެ ޕާޓީގެ ހުރިހާ މެންބަރުންގެ ޕާޓީއެއް ކަމަށެވެ.
