ބައިނަލްއަޤްވާމީ އެކުވެރިކަމުގެ މެޗެއްގައި، ސިންގަޕޫރުގެ 19 އަހަރުން ދަށުގެ ޓީމާ ބައްދަލުކޮށް ކުޅުނު މެޗުގައި ދިވެހިރާއްޖޭގެ 20 އަހަރުން ދަށުގެ ޤައުމީ ޓީމުން ކާމިޔާބީ ހޯދައިފިއެވެ.
ސިންގަޕޫރުގެ ޗޯ ޗޫ ކަންގް ސްޓޭޑިއަމްގައި ކުޅުނު މި ފޯރިގަދަ މެޗު ރާއްޖޭގެ ޓީމުން ކުރި ހޯދާފައިވަނީ 3-4 ގެ ނަތީޖާއަކުންނެވެ. މި މެޗުގައި ފުރަތަމަ ހާފު ނިމިގެންދިޔައިރު، ދެ ޓީމު އޮތީ 2-2 އިން އެއްވަރުވެފައެވެ. ނަމަވެސް ދެވަނަ ހާފުގައި ރާއްޖެއިން ނަތީޖާ ނެރެފައިވަނީ އިތުރަށް ދެ ގޯލު ޖަހައިގެންނެވެ. ސިންގަޕޫރަށް ދެ ވަނަ ހާފުގައި ޖެހުނީ އެންމެ ގޯލެކެވެ.
މި މެޗުގައި ރާއްޖޭގެ ޓީމަށް ލަނޑުތައް ކާމިޔާބުކޮށްދިނީ މުބާރާތުގައި ބައިވެރިވި ޒުވާން ހަތަރު ކުޅުންތެރިން ކަމުގައިވާ، މާޒިޔާ ސްޕޯޓްސް އެންޑް ރެެކްރިއޭޝަންގެ މުޙައްމަދު އިލާން ޢިމްރާން، ކްލަބް ވެލެންސިއާގެ އީތަން އިބްރާހިމް ޒަކީ އަދި އޮޑި ސްޕޯޓްސް ކްލަބްގެ އަހުޒަމް ރަޝީދު އަދި އަލްހާން ފައިސަލް އަމީން އެވެ.
މި ދަތުރުގައި ރާއްޖޭގެ ޒުވާން ޓީމުން ސިންގަޕޫރުގެ 19 އަހަރުން ދަށުގެ ޓީމާ ދެކޮޅަށް ދެ މެޗެއް ކުޅުމަށް ވަނީ ހަމަޖެހިފައެވެ. އެގޮތުން މިއަދު ފުރަތަމަ މެޗު ކުޅެފައިވާއިރު، ދެވަނަ މެޗު ކުޅުމަށް ތާވަލުކޮށްފައިވަނީ މި މަހުގެ 11 ވާ ބުދަ ދުވަހުއެވެ.
ސިންގަޕޫރުގައި ކުރިއަށްގެންދާ މި މުބާރާތަށްފަހު، ޓީމު އެނބުރި ރާއްޖެ އައުމަށް ހަމަޖެހިފައިވަނީ އަންނަ ބުރާސްފަތި ދުވަހުއެވެ. ފާހަގަކޮށްލެވޭ ގޮތުގައި މި ފަހަރުގެ ސާފް ޗެމްޕިއަންޝިޕަށް ރާއްޖޭގެ ޓީމު ތައްޔާރުވަމުންދަނީ، ޤައުމީ ޓީމުގެ ކޯޗު ހަންގޭރީގެ އިސްޓަވާން އުރުބާނީގެ ބެލުމުގެ ދަށުންނެވެ.
