އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަމެއް އޮތް ނަމަވެސް، މި ސަރުކާރުގެ ”ބޯހިޔާވަހިކަން އެންމެންނަށް“ ސިޔާސަތުގެ ދަށުން ދޫކުރާ ގޯއްޗަށް އެދި ފޯމު ހުށަހެޅުމުގެ ފުރުޞަތު ހުޅުވާލައިފިއެވެ.
މިކަމާ ގުޅިގެން ކޮންސްޓްރަކްޝަން މިނިސްޓްރީން ނެރެފައިވާ އިޢުލާނެއްގައި ބުނެފައިވަނީ، 1 މާރިޗު 2026 ވީ އާދިއްތަ ދުވަހު ގެޒެޓުގައި ޝާއިޢުކޮށްފައިވާ އުޞޫލާ އެއްގޮތަށް، ބޯހިޔާވަހިކަން އެންމެންނަށް ސިޔާސަތުގެ ދަށުން މާލޭގައި ދިރިއުޅޭ ރައްޔިތުން ދިރިއުޅުމަށް ބާންޑާރަ ގޯއްޗަށް އެދި ފޯމު ހުށަހެޅުމަށް ހުޅުވާލާ ކަމަށެވެ.
އަނބިމީހާ/ފިރިމީހާގެ ބޯހިޔާވަހިކަމެއް އޮތް ނަމަވެސް ގޯއްޗަށް އެދި ހުށަހެޅޭ ގޮތަށް ހިންގާ "ގޯތިގެދޮރު" ޕްރޮގްރާމުގެ ދަށުން ގޯއްޗަށް އެދި ފޯމު ހުށަހެޅުމަށް މިހާރު ވަނީ ހުޅުވާލެވިފައި
އިއުލާނު: https://t.co/mrhGagQhsF
ފޯމު ހުށަހެޅުމަށް: https://t.co/RmhurERkNa pic.twitter.com/oIAJthdbC0— Ministry of Construction, Housing & Infrastructure (@MoCImv) March 8, 2026
އަނބިމީހާ ނުވަތަ ފިރިމީހާގެ ނަމުގައި ބޯހިޔާވަހިކަމެއް އޮތް ނަމަވެސް، ގޯއްޗަށް އެދި ފޯމު ހުށަހެޅޭނެ ގޮތަށް ހަމަޖައްސަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރެއްވީ މި އަހަރުގެ ރިޔާސީ ބަޔާން އިއްވަވަމުންނެވެ. ސަރުކާރުގެ މި ނިންމުމަކީ ގޯއްޗެއް ނުވަތަ ފުލެޓެއް އޮތުމުގެ ސަބަބުން އިތުރު ބޯހިޔާވަހިކަމަކަށް ކުރިމަތި ނުލެވޭ މައްސަލާގައި ޢާންމުންގެ ކަންބޮޑުވުންތަކަށް ޙައްލެއް ހޯދައިދީ، ކޮންމެ ޢާއިލާއަކީވެސް އަމިއްލަ ބޯހިޔާވަހިކަން ކަށަވަރުވެފައިވާ ބަޔަކަށް ހެދުމަށް ނިންމި ނިންމުމެކެވެ.
މި ސަރުކާރުން ދޫކުރާ ގޯއްޗާއި ފުލެޓަށް އެދި ފޯމު ހުށަހެޅުމުގެ ފުރުޞަތު އަންނަ އޭޕްރީލް މަހުގެ 30 ވަނަ ދުވަހުގެ ނިޔަލަށް ކޮންސްޓްރަކްޝަން މިނިސްޓްރީން ވަނީ ހުޅުވާލައިފައެވެ. ގޯއްޗާއި ފުލެޓަށް އެދި ފޯމު ހުށަހަޅާނީ އެ މިނިސްޓްރީގެ ”ބޯހިޔާވަހިކަން“ ޕޯޓަލް މެދުވެރިކޮށެވެ.
ސަރުކާރުގެ ބޯހިޔާވަހިކަން އެންމެންނަށް ސިޔާސަތުގެ ދަށުން، ރަސްމާލެއިން ޖުމްލަ 1،250 އަކަފޫޓުގެ ގޯތި، މާލޭގެ ރަށްވެހިންނަށާއި، މާލޭގައި ދިރިއުޅޭ އެހެން ރަށްރަށުގެ ރަށްވެހިންނަށް ޚާއްޞަކޮށްގެން ދޫކުރުމަށް ވަނީ ހަމަޖެހިފައެވެ.
