ދިވެހިރާއްޖޭގެ ކަނޑުގެ ސަރަޙައްދުން ބައެއް ދޫކޮށްލުމަކީ، އުމުރަށް ޖަލަށްލާން ޖެހޭ ވަރުގެ ބޮޑު ކުށެއް ކަމަށް ކޮންގްރެސް ޕާޓީގެ ޕާލިމެންޓްރީ ގުރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާޙު ވިދާޅުވެއްޖެއެވެ.
ފަލާޙު މި މޭރުމުން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި އިދިކޮޅު އެމްޑީޕީގެ ބައެއް މެންބަރުން ސަރުކާރާ ދެކޮޅަށް ދައްކަމުންދާ ވާހަކަތަކަށް ރައްދުދެއްވަމުންނެވެ. ފަލާޙު ވިދާޅުވީ، ދިވެހިރާއްޖޭގެ ސަރަޙައްދަކީ ޤާނޫނީ ގޮތުން ދަމާލެވިފައިވާ، ދިވެހިރާއްޖޭގެ އާކިޕެލޮޖިކް ބޭސްލައިންތަކުގެ ތެރޭގައިވާ ބިމާއި، ޖައްވާއި، ކަނޑާއި އަދި ކަނޑުގެ އަޑީގައިވާ ބިން ހިމެނޭ ސަރަޙައްދު ކަމަށެވެ.
އަދި މިއިން އެއްވެސް އެއްޗެއް ދޫކޮށްލެވޭނީ މަޖިލީހުގެ ތިންބައިކުޅަ ދެބައި މެންބަރުންގެ ރުހުން ލިބިގެން ކަމަށް ޤާނޫނުއަސާސީގައި ވަރަށް ޞަރީޙަ ޢިބާރާތުން ބަޔާންކޮށްފައިވާ ކަމަށް ފަލާޙު ވަނީ ވިދާޅުވެފައެވެ.
ނަމަވެސް ނިމިދިޔަ އެމްޑީޕީ ސަރުކާރުން ރާއްޖޭގެ ކަނޑުގެ ސަރަޙައްދުން ބޮޑު ބައެއް ދޫކޮށްލީ އެކަމާ މެދު ވަކި ޚާއްޞަގޮތެއް ނިންމުމަށް މަޖިލީހަށް ހުށަހެޅުމެއްނެތި އަދި ރައްޔިތުންގެ ޚިޔާލު އެކަމުގައި ހޯދުމަކާ ނުލައި ކަމަށް ފަލާޙު ވިދާޅުވިއެވެ. މީގެ އިތުރުން ކުރީގެ ރައީސް އިބްރާހިމް މުޙައްމަދު ޞާލިޙް ކަނޑުގެ ސަރަޙައްދުން ބައެއް ދޫކޮށްލަން އެއްބަސްވާ ކަމަށް މޮރިޝަސްއަށް ސިޓީއެއް ފޮނުވައި، ކަނޑުގެ ސަރަަޙައްދުން ބައެއް ދޫކޮށްލީ ރިޝްވަތު ހިފައިގެން ކަމަށްވެސް ފަލާހު ވަނީ ވިދާޅުވެފައެވެ.
”މި ބޭފުޅުންނަކީ، ރައްޔިތުންގެ މަޖިލީހުން ފާސްކުރުމަކާނުލައި ދިވެހިރާއްޖޭގެ ބޮޑު ސިންގާ ބައެއް ވިއްކާލާފައި ތިބި ބައެއް. އެކޮޅަށް ދިޔައީ ތުނިތުނި ސިޓީ އުރައެއް. މިކޮޅަށް އައީ ގޯނިތަކެއް. ބޮޑެތި ގޯނީގައި އެއްޗެހި ހިފައިގެން އައީ،“ ފަލާޙު ވިދާޅުވިއެވެ.
ދިވެހިރާއްޖޭގެ ކަނޑުގެ ސަރަޙައްދުން ބޮޑު ބައެއް ދޫކޮށްލުމަކީ އުމުރު ދުވަހުގެ ޖަލު ޙުކުމެއް އަންނަންޖެހޭ ވަރުގެ ބޮޑު ކުށެއްކަން ފާހަގަކުރައްވަމުން ފަލާޙު އިތުރަށް ވިދާޅުވީ، މިފަދަ ޢަމަލުތަކަކީ ޤައުމަށް ގައްދާރުވުން ކަމަށް ދެންނެވިދާނެ ކަމަށެވެ.
