ކުރިއަށް އޮތް ލޯކަލް ކައުންސިލްތަކުގެ އިންތިޚާބަށް ތައްޔާރުވުމަށް، މިރޭ މާލޭ އާޓިފިޝަލް ބީޗު ސަރަޙައްދުގައި ”ދަ ގްރޭޓަރ އައްޑޫ“ ގެ ނަމުގައި ކުރިއަށްގެންދާ ބިޔަބޮޑު ޖަލްސާ އަށް މުޅި އާޓިފިޝަލް ބީޗް ސަރަޙައްދު ފުރާލައިފިއެވެ.
ކޮންގްރެސް ޕާޓީން ވަނީ ދަ ގްރޭޓަރ އައްޑޫ މާލޭ ޖަލްސާއަށް، އައްޑޫ ސިޓީގެ ރައްޔިތުންނަށާއި، އެ ޕާޓީގެ މެންބަރުންނާއި ޕާޓީގެ ހުރިހާ ސަޕޯޓަރުންނަ ދަޢުވަތު އަރުވައިފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވަޑައިގަންނަވާ މި ޖަލްސާ ފަށާފައިވަނީ މިރޭ 21:30 އެހައިކަންހާއިރުއެވެ.
ދަ ގްރޭޓަރ އައްޑޫ – މާލެ ޖަލްސާގައި ބައިވެރިވެވަޑައިގެން ދެއްވުމަށް އެދި ކޮންގްރެސް ޕާޓީއަށް ތާއިދު ކުރައްވާ އެންމެހާ ލޮބުވެތި ރައްޔިތުންނަށް ދަޢުވަތު އަރުވަން.
ތާރީޚް: 07 މާރޗް 2026 (މިރޭ)
ގަޑި: 21:30
ތަން: އާޓިފިޝަލް ބީޗް#LCE2026 #VotePNC #DhiveheengeRaajje… pic.twitter.com/LZ7QILXXz2— PNC Secretariat (@pnc_secretariat) March 7, 2026
މި ޖަލްސާގައި އެމްޑީޕީއަށް އަށް ނިސްބަތްވާ ގިނަ އަދަދެއްގެ ފަރާތްތަކުން ވަނީ ޕީއެންސީއަށް ސޮއިވެސް ކުރައްވައިފައެވެ.
ކުރިއަށް އޮތް ލޯކަލް ކައުންސިލްތަކުގެ އިންތިޚާބަށް ތައްޔާރުވުމުގެ ގޮތުން ކޮންގްރެސް ޕާޓީން އަންނަނީ ގިނަ ހަރަކާތްތަކެއް ހިންގަމުންނެވެ. އެގޮތުން ދޮރުން ދޮރަށް ހިނގުމުގެ ހަރަކާތްތަކާއި، ސިޓީތަކުގެ ކެމްޕޭން ޖަގަހަތައް މާލޭ ސިޓީގައި ހުޅުވުން ފަދަ ހަރަކާތްތައް ހިމެނެއެވެ. އެގޮތުން އައްޑޫ ސިޓީގެ ކެމްޕޭން ޖަގަހަވެސް މީގެކުރިން މާލޭ ސިޓީގައި ވަނީ ހުޅުވައިފައެވެ.
ކޮންގްރެސް ޕާޓީން ކުރިއަށްގެންދާ މިފަދަ ހަރަކާތްތަކުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެސް ގެންދަވަނީ އެ ޕާޓީގެ ރައީސްގެ ހައިސިއްޔަތުން ގިނަ މަސައްކަތްޕުޅުތަކެއް ކުރައްވަމުންނެވެ. މީގެ ތެރޭގައި މާލޭ ސިޓީގެ އެކި ދާއިރާތަކަށް ޕީއެންސީގެ ފަރާތުން ވާދަކުރާ ކެންޑިޑޭޓުންނަށް ތާއީދު ހޯއްދަވައިދެއްވުމަށްޓަކައި އެ ކެންޑިޑޭޓުންނާއެކު މިހާތަނަށް 11 ދާއިރާއެއްގެ ދޮރުން ދޮރަށް ހަރަކާތުގައި އެމަނިކުފާނު ވަނީ ބައިވެރިވެވަޑައިގެންފައެވެ.
ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން، ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްދުވަހެއްގައި ބޭއްވުމުގެ ކުރިން ނަގަން ނިންމާފައިވާ ފެންނަ ނުފެންނަ ވޯޓު ނެގުން އޮންނާނީ އަންނަ އޭޕްރީލް މަހުގެ ހަތަރުވަނަ ދުވަހުއެވެ.
