ދިވެހި ފުލުހުންގެ ޚިދުމަތުން އާންމު ރައްޔިތުންނާ ގާތުން ބައްދަލުކޮށް، ޚިޔާލު ހޯދުމަށް ކުރިއަށްގެންދާ ”ވޯކް އެންޑް ޓޯކް“ ހަރަކާތް މިއަދު ކުރިއަށް ގެންގޮސްފިއެވެ.
މި ހަރަކާތް ކުރިއަށްގެންގޮސްފައިވަނީ މިއަދު، ހަވީރު 4:30 އިން 5:45 އަށް، މާލެ, ވިލިމާލެ، އަދި ހުޅުމާލޭގެ އިތުރުން އަތޮޅު ތެރޭގެ ރަށްރަށުގައެވެ. މި ހަރަކާތުގެ ތެރެއިން މިއަދުވެސް އެކި ސަރަޙަދުތަކުން ގިނަ ރައްޔިތުންނާއި ބައްދަލުކޮށް، ޚިޔާލާއި މަޝްވަރާ ފުލުހުން ވަނީ ހޯއްދަވާފައެވެ.
ދިވެހި ފުލުހުންގެ ޚިދުމަތުން އާންމު ރައްޔިތުންނާ ގާތަށް ވަޑައިގެން ކުރިއަށްގެންދާ ”ވޯކް އެންޑް ޓޯކް“ ޙަރަކާތަކީ ފުލުހުންނާއި ރައްޔިތުންނާ ދެމެދު އޮންނަ ގުޅުން ބަދަހިކޮށް، އާންމުންގެ ޚިޔާލާއި ކަންބޮޑުވުންތައް ދެނެގަތުމަށް ބާއްވާ ހަރަކާތެއްކަމަށް ފުލުހުން ބުނެއެވެ.
މި ހަރަކާތާއިބެހޭގޮތުން ފުލުހުންގެ ތަރުޖަމާނު މީގެ ކުރިން ވިދާޅުވީ މި ޕްރޮގްރާމަކީ ރައްޔިތުންނާއި ކައިރިން ފުލުހުންނާއި ރައްޔިތުން ހިމެނޭހެން ރަނގަޅުކުރަން ހުރިކަންކަން އިތުރަށް ދެނެގަނެ، ކަންކަން އޮޅުންފިލުވާ، އެކަންކަމާ މަޝްވަރާކުރުމަށްޓަކާ، ޚާޢްޞަކޮށް ފުލުހުންގެ ސީނިއާ ހުރިހާ ފުލުހުންވެސް ހިމެނޭ ގޮތަށް ގެންދެވޭ އިވެންޓެއް ކަމަށެވެ. އަދި ފުލުހުންނާއި ރައްޔިތުންނާ ދެމެދު އޮންނަ ގުޅުން ބަދަހިކޮށް، އާންމުންގެ ޚިޔާލާއި ކަންބޮޑުވުންތައް ދެނެގަތުމަކީވެސް މި ހަރަކާތުގެ އެއް މަޤުސަދު ކަމަށް ވިދާޅުވިއެވެ.
📸 ރާއްޖޭގެ އެކި ކަންކޮޅުތަކުގައި މިއަދު ކުރިއަށްދިޔަ "ވޯކް އެންޑް ޓޯކް" ހަރަކާތް.
މި ހަރަކާތުގެ ތެރެއިން ގިނަ އަދަދެއްގެ ރައްޔިތުންނާ ބައްދަލުކޮށް، އެފަރާތްތަކުގެ ހިޔާލާއި މަޝްވަރާ ވަނީ ހޯދާފަ.
މި ހަރަކާތުގައި މިނިސްޓަރ އޮފް ހޯމް ލޭންޑް ސެކިއުރިޓީ އެންޑް ޓެކްނޮލޮޖީ އަލީ… pic.twitter.com/VKrVPijnPi
— Maldives Police (@PoliceMv) March 7, 2026
މިއަދުގެ ހަރަކާތުގައިވެސް ގިނަ އަދަދެއްގެ ފުލުހުން ވަނީ ބައިވެރިވެފައެވެ. އޭގެތެރޭގައި ފުލުހުންގެ އެކި ޑިޕާޓްމަންޓް ތަކުގެ އެކި ފަންތީގެ ބޭފުޅުން ވަނީ ބައިވެރިވެފައެވެ. އާންމުންގެ ފަރާތުން މި ހަރަކާތަށް ބޮޑު ތަރުޙީބެއް ލިބިގެންގޮސްފައިވާއިރު، މިއަދު މިވަނީ މި ޙަރަކާތް މުޅި ރާއްޖެއަށް ފުޅާކުރުމުގެ މަސައްކަތް ފަށާފައެވެ.
”މި ހަރަކާތުގެ ތެރެއިން އަޅުގަނޑުމެން ރައްޔިތުންނާ ގުޅިގެން ރައްޔިތުންގެ ކަންބޮޑުވުންތައް އޮޅުންފިލުވުމުގެ އިތުރަށް އެ ސަރަޙައްދެއްގައި، އެ ރަށެއްގައި ނުވަތަ ފުލުހުން އެ ޚިދުމަތްކުރާ ރަށެއްގައި، އަތޮޅެއްގައި އަޅުގަނޑުމެން ރަނގަޅުކުރަން ހުރި ކަންކަން ވަކިން ޚާއްސަކޮށް އަހައި، އަދި އަޅުގަނޑުމެންވެސް ރިކޯޑްކުރާނެ ވަކި މެކޭނިޒަމެއް ބޭނުންކޮށްގެން އެކަންކަން އަޅުގަނޑުމެން ހޯދުމަށްފަހު، ދުރު މުސްތަޤުބަލުގައިވެސް ހައްލުކުރަން ހުރި ކަންކަމާގުޅޭގޮތުން އަޅުގަނޑުމެން މަސައްކަތްކުރާނަން.“ ޝިފާން ވިދާޅުވިއެވެ.
ފާހަގަކޮށްލެވޭ ގޮތުގައި ދިވެހިފުލުހުންގެ ޚިދުމަތުން ދަނީ މުޅިރާއްޖޭގައިވެސް މިފަދަ އެކި ކަހަލަ ޕްރޮގްރާމްތައް ހިންގާ ރަައްޔިތުން ހޭލުންތެރި ކުރުމުގެ ގިނަގުނަ މަސައްކަތްތަކެއް ކުރައްވަމުންނެވެ.
