މަސްވެރިންގެ ދަފްތަރުގައި ރަޖިސްޓްރީވެފައިވާ 80 އަށްވުރެ ގިނަ މަސްވެރިއަކަށް ބޭންކް އޮފް މޯލްޑިވްސް (ބީއެމްއެލް) އިން މިހާތަނަށް ލޯނު ދޫކޮށްފައިވާ ކަމަށް ފިޝަރީޒް މިނިސްޓްރީން ހާމަކޮށްފިއެވެ.
ފިޝަރީޒް މިނިސްޓްރީއާ ޙަވާލާދީ ދަޢުލަތުގެ މީޑިއާއިން ބުނެފައިވަނީ، މި ލޯނަކީ މިދިޔަ 2025 ވަނަ އަހަރުގެ މެއި މަހުގެ ފުރުތަމަ ދުވަހުން ފެށިގެން މަސްވެރިންގެ ދަފްތަރުގައި ރަޖިސްޓްރީކޮށްފައިވާ މަސްވެރިންނަށް ދޫކޮށްފައިވާ ލޯނުގެ އަދަދެއް ކަމަށެވެ. ބީއެމްއެލްގެ މި ލޯނު ޖުމްލަ 89 މަސްވެރިއަކަށް ދޫކޮށްފައިވާ ކަމަށް އެ މިނިސްޓްރީން މަޢުލޫމާތުދެއެވެ.
މި ލޯނަކީ ބީއެމްއެލްގެ މަސްވެރިޔާ ޕޯޓަލް މެދުވެރިކޮށް ދޫކުރާ ލޯނެކެވެ.
މި ޕޯޓަލް މެދުވެރިކޮށް ގެދޮރު ގަތުމަށާއި، ގެދޮރު ޢިމާރާތް ކުރުމަށާއި، މަތީ ތަޢުލީމް ޙާސިލް ކުރުމަށާއި، އުޅަނދު ބަނދެ، މަރާމާތު ކުރުމުގެ އިތުރުން ގެސްޓްހައުސް ވިޔަފާރިއަށް އިންވެސްޓް ކުރުމަށާއި، ލުއި ފައިނޭންސިންއަށް އެދެވޭނެއެވެ. މި އިންތިޒާމުގެ ދަށުން ޝަރުތު ހަމަވާ މަސްވެރިންނަށް ރަހުނަކާ ނުލައި އަދި އިކުއިޓީއާ ނުލައި 300,000 ރުފިޔާއާ ހަމައަށް ޕާސަނަލް ފައިނޭންސިން ވެސް ނެގޭނެއެވެ. މީގެ އިތުރުން ލިބޭ އާމްދަނީއަށް ރިޢާޔަތްކޮށް، އަނބުރާ ފައިސާ ދެއްކުމަށް ލުއިފަސޭހަ ގޮތްތަކެއްވެސް ބީއެމްއެލްއިން ހަމަޖައްސައިދީފައިވެއެވެ.
މަސްވެރިންނަށް ފަސޭހަކަމާއެކު ފައިނޭންސް ލިބޭނެ މަގު ފަހިކޮށްދިނުމަށް ބީއެމްއެލްއާއި ފިޝަރީޒް މިނިސްޓްރީއާ ދެމެދު އެއްބަސްވުމެއްގައި ސޮއިކޮށްފައިވަނީ، މިދިޔަ 2025 ވަނަ އަހަރުގެ އޭޕްރީލް މަހުގެ 28 ވަނަ ދުވަހުއެވެ. މި އެއްބަސްވުމުގެ ދަށުން މަސްވެރިންނަށް ލޯނު ދޫކުރަން ފަށާފައިވަނީ، އޭގެ ތިން ދުވަސް ފަހުން، މެއި މަހުގެ ފުރަތަމަ ދުވަހުން ފެށިގެންނެވެ.
ފާހަގަކޮށްލެވޭ ގޮތުގައި މި ސަރުކާރުން އަންނަނީ މަސްވެރިންނަށް އެތަކެއް ލުއި ފަސޭހަ ގޮތްތަކެއް ހޯދައިދިނުމަށް އެތަކެއް މަސައްކަތްތަކެއް ކުރަމުންނެވެ.
