ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު ގިނަ އަދަދެއްގެ ސިނގިރޭޓް މޯލްޑިވްސް ކަސްޓަމްސްއިން އަތުލައިގަނެފިއެވެ.
މި މައްސަލައާ ގުޅިގެން ކަސްޓަމްސްއިން އެކްސްގައި ޙިއްޞާކޮށްފައިވާ ޕޯސްޓެއްގައި ބުނެފައިވަނީ، މި ތަކެތި އަތުލައިގަނެފައިވަނީ މާލެ ކޮމާޝަލް ހާބަރަށް ބޭލި މުދަލުގެ ތެރެއިން ކަމަށެވެ. އެގޮތުން މި ޝިޕްމަންޓުގައި ޖުމްލަ 99،000 ސިނގިރޭޓް ސްޓިކްސް ހުރި ކަމަށް ކަސްޓަމްސްއިން ވަނީ މަޢުލޫމާތު ދީފައެވެ.
މި ތަކެތި އަތުލައިގަނެފައިވަނީ މި މަހުގެ ފަސްވަނަ ދުވަހު ކަމަށްވެސް ކަސްޓަމްސްއިން މަޢުލޫމާތުދެއެވެ.
މި މައްސަލައާ ގުޅިގެން ކަސްޓަމްސްއިން ބުނެފައިވާ ގޮތުގައި، މި ތަކެއްޗަކީ ޤަވާއިދާ ޚިލާފަށް ސިއްރުން ރާއްޖެއަށް އެތެރެކުރަން އުޅުނު ތަކެތި ކަމަށެވެ. ނަމަވެސް މި މައްސަލައާ ގުޅިގެން އެއްވެސް މީހަކަށް ނުވަތަ ބަޔަކަށް އެއްވެސް ފިޔަވަޅެއް މިހާތަނަށް އަޅާފައިވާ ކަމަކަށް ކަސްޓަމްސްއިން ހާމަކޮށްފައެއް ނުވެއެވެ.
ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 99،000 ސިނގިރޭޓް ސްޓިކްސް ކަސްޓަމްސްއިން އަތުލައިގެންފި. pic.twitter.com/H110zklODp
— Maldives Customs Service (@CustomsMv) March 7, 2026
ޤާނޫނާ ޤަވާއިދާ ޚިލާފަށް ރާއްޖެއަށް އެތެރެވަމުންދާ ތަކެތި އަދި ރާއްޖެއަށް އެތެރެކުރުން މަނާ ތަކެތި ހިފެހެއްޓުމަށް ކަސްޓަމްސްއިން ދަނީ ބުރަ މަސައްކަތްތަކެއް ކުރަމުންނެވެ. އެގޮތުން ކުރެވުނު މަސައްކަތްތަކުގެ އަލީގައި ފާއިތުވި ދޮޅުމަހެއްހައި ދުވަހުގެ ތެރޭގައި ވަނީ ހަތް ހާސް ވޭޕް ސްޓިކާއި، ދެ މިލިއަނެއްހައި ސިނގިރޭޓް އަތުލައިގަނެފައެވެ.
