އެމެރިކާ އާއި އިސްރާއީލުން ފޮނުވާ ވައިގެ ހަމަލާތައް އަމާޒުކުރަނީ އީރާނުގެ އާއްމު ސަރަހައްދުތަކަށް ކަމަށް އެޤައުމުގެ އޮފިޝަލުން ބުނެފިއެވެ.
އީރާނުގެ އޮފިޝަލަކު މިއަދު ވިދާޅުވެފައިވަނީ އެންމެފަހުން މިއަދު އަފްޝާން ޕްރޮވިންސަށް ދިން ހަމަލާތައްވެސް އަމާޒުކޮށްފައިވަނީ އާއްމުން ދިރިއުޅޭ ސަރަހައްދުތަަކށް ކަމަށެވެ. އެގޮތުން މިއަދުގެ ހަމަލާތަކުގައި އެކަނިވެސް 8 މީހެއްގެ ފުރާނަ ގެއްލި އެތައްބަޔަކު ޒަހަމްވެފައިވާކަމަށް ވިދާޅުވިއެވެ.
އަފްޝާން ޕްރޮވިންސްގެ ގަވަރުނަރު އޮފީހުގެ އޮފިޝަލް އަކްބަރު ސަލައިހީ ވިދާޅުވީ ޓެރަރިސްޓުން މިއަދު ދިން ހަމަލާތަކުިގައި ފުރާނަ ގެއްލުނު އާއްމު ރައްޔިތުންގެ ތެރޭގައި އަންހެނުންނާއި ކުޑަކުދިން ހިމެނޭކަމަށެވެ. އޭނާ ވިދާޅުވީ މިދިޔަ ދެ ދުވަހުގެ މަތިން ދިން ހަމަލާތަކުގައި އެ ޕްރޮވިންސްގެ އާއްމުން ދިރިއުޅެމުންދިޔަ އެތައް ތަނަކަށް ހަމަލާދީފައިވާކަމަށެވެ.
އީރާނުގައި ނުރައްކާތެރި ފަނާކުރަނިވި ހަތިޔާރު އުފައްދާކަމަށް ތުހުމަތުކޮށް އެމެރިކާ އަދި އިސްރާއީލުން އިސްވެ ދޭންފެށި މި ހަމަލާތަކުގައި އެންމެ ފުރަތަމަ ބިމާ ހަމަކޮށްލި ތަންތަނުގެ ތެރޭގައި އީރާނުގެ އަންހެންކުދިންނަށް ހާއްސަ ސްކޫލެއް ހިމެނެއެވެ. އެ ހަމަލާގައި 160 ހަށްވުރެ ގިނަ ދަރިވަރުންގެ ފުރާނަ ގެއްލުނުއިރު، އދ ގެ ކަމާ ބެހޭ އިދާރާއިން ވަނީ އެ ހަމަލާ ކުށްވެރިކޮށްފައެވެ. އަދި މިހަމަލާގެ ޒިންމާ ނަގަންޖެހޭނީ އެމެރިކާގެ އަސްކަރިއްޔާއިން ކަމަށް އެމެރިކާގެ އަސްކަރީ ތަހުޤީޤީ އިދާރާއިން ވަނީ ހާމަކޮށްފައެވެ.
