މާލޭ ބާޒާރުމަތީ ސަރަޙައްދުގައި ވޯރާ ވިޔަފާރިވެރިން ބިނާކުރި ބުންބާ މިސްކިތް ނުވަތަ މިހާރުގެ ނަމުންނަމަ، މަސްޖިދުއްސުލްޠާން މުޙައްމަދު ޝަމްސުއްދީން (ބަންޑާރަ މިސްކިތް) ހުރި ސަރަޙައްދުގައި އައު މިސްކިތެއް ބިނާކުރުމާމެދު ފުޅާ ދާއިރާއެއްގައި މަޝްވަރާކުރައްވަން ބޭނުންފުޅުވާ ކަމަށް އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ބަންޑާރަ މިސްކިތް ހުރި ސަރަޙައްދުގައި ޒަމާނީ ފެންވަރަކަށް ޖާގަ ތަނަވަސް އައު މިސްކިތެއް ބިނާކުރުމަށް ނިންމާފައިވާކަމަށް މީގެ ކުރިން މިނިސްޓަރު ހާމަކުރެއްވުމާ ގުޅިގެން އެ މިސްކިތް ތަޅައިނުލުމަށް ސޯޝަލް މީޑިއާގައި ގިނަބަޔަކު ވަނީ ގޮވާލައިފައެވެ.
ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމެނާފަ އޮންނަ މިސްކިތެއްނޫންވީމާ އެތަނުގައި ބޮޑު މިސްކިތެއް ބިނާކުރަން ޤަސްތުކުރީ. މިނިސްޓްރީން ކަންކަން ކުރާނީ ރައްޔިތުންގެ އަޑުއަހާފަ. އެއާ އެއްގޮތަށް. އާ މިސްކިތެއް ބިނާކުރުމާމެދު ފުޅާ ދާއިރާއެއްގައި… pic.twitter.com/oFCHsuRb0v
— Mohamed Shaheem Ali Saeed (@Mohamedshaheem1) March 6, 2026
މިކަމާ ގުޅިގެން މިނިސްޓަރު ޝަހީމް ވިދާޅުވީ، ބަންޑާރަ މިސްކިތަކީ ރާއްޖޭގެ އާސާރީ ތަރިކައިގެ މިސްކިތްތަކުގެ ތެރޭގައި ހިމެނޭ މިސްކިތެއް ނޫން ކަމަށެވެ. ބަންޑާރަ މިސްކިތް ހުރި ސަރަޙައްދުގައި، ޒަމާނީ ފެންވަރަކަށް ޖާގަ ތަނަވަސް އައު މިސްކިތެއް ބިނާކުރައްވަން ޤަސްދުކުރެއްވީ އެހެންވެ ކަމަށް މިނިސްޓަރު ވިދާޅުވިއެވެ.
ބަންޑާރަ މިސްކިތް ހުރި ސަރަޙައްދުގައި އައު މިސްކިތެއް ބިނާކުރުމާ ގުޅޭގޮތުން އާންމު ރައްޔިތުންނާއި ކަމާ ގުޅުންހުރި ފަރާތްތަކާއެކު މަޝްވަރާ ކުރައްވާނެ ކަމަށާއި، އިސްލާމިކް މިނިސްޓްރީން މިފަދަ ނިންމުންތައް ނިންމާނީ ރައްޔިތުންގެ އަޑުއަހައި އެއާ އެއްގޮތްވާ ގޮތުގެ މަތިން ކަމަށް މިނިސްޓަރު ޝަހީމް ވަނީ އިތުރަށް ވިދާޅުވެފައެވެ.
ބަންޑާރަ މިސްކިތް ނުވަތަ ކުރީގެ ނަމުންނަމަ ބުމްބާ މިސްކިތަކީ، ރާއްޖެއަށް ޒިޔާރަތްކުރި ޝިޔައީ މަޒްހަބަށް ނިސްބަތްވާ ވޯރާ ވިޔަފާރިވެރިން މީގެ 98 އަހަރު ކުރިން ބިނާކޮށްފައިވާ މިސްކިތެކެވެ. މި މިސްކިތަށް އެކި ސަރުކާރުތަކުން ޒަމާނާ އެއްގޮތަށް ބަދަލުތައްވެސް ގެނެސްފައިވެއެވެ. އެހެންނަމަވެސް މިސަރުކާރުން މިސްކިތުގެ ޖާގަ ބޮޑުކުރަން ނިންމުމާއެކު އިދިކޮޅު އެމްޑީޕީން ވަނީ މިކަމާ ދެކޮޅަށް ނުކުމެފައެވެ.
