ރާއްޖެއަށް މަސްތުވާތަކެތި އެތެރެކުރާ ދިމަދިމާ ދެނެގަނެ، އެ މަގުތަކުން މަސްތުވާތަކެތި އެތެރެވުން ހުއްޓުވުމަށް މަސައްކަތް ކުރަމުންދާ ކަމަށް ހޯމް މިނިސްޓަރ ޢަލީ އިޙްސާން ވިދާޅުވެއްޖެއެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިޙްސާން ވަނީ، މަސްތުވާތަކެތީގެ މައްސަލަ ހައްލުކުރުމަށް ވޭތުވެދިޔަ ދުވަސްތަކުގައި މިސަރުކާރުން ކުރި އަދި މިހާރުވެސް ކުރެވެމުންދާ މަސައްކަތަށް އަލި އަޅުއްވާލައްވާފައެވެ. އެގޮތުން ރާއްޖެ އެތެރެކުރާ މަސްތުވާތަކެތި ހުއްޓުވުމަށް ކުރަމުންދާ މަސައްކަތަކާއިބެހޭ ބައެއް ތަފާސްހިސާބުތައް މިނިސްޓަރ ހިއްސާކުރެއްވިއެވެ.
މިނިސްޓަރ ވިދާޅުވީ ވޭތުވެ ދިޔަ ދޮޅު މަސް ދުވަހުގެ ތެރޭގައި ފުލުހުންނާއި ކަސްޓަމްސް ގުޅިގެން ހިންގުނު އެކި އޮޕަރޭޝަންތަކުގައި ޖުމްލަ 83.45 ކިލޯގެ މަސްތުވާތަކެތި ވަނީ އަތުލައިގަނެފައި ކަމަށެވެ. މިތަކެތީގެ މަގުމަތީ އަގު 72.2 މިލިޔަން ރުފިޔާއަށް އަރާ ކަމަށް އިޙްސާން ވިދާޅުވިއެވެ. މީގެ ތެރެއިން 72 ކިލޯގެ މަސްތުވާތަކެއްޗަކީ ރާއްޖޭގެ ބޯޑަރު ހުރަސްކޮށް އެތެރެކުރަން މަސައްކަތް ކުރަނިކޮށް ކަސްޓަމްސްއިން އަތުލައިގެންފައިވާ މަސްތުވާތަކެތި ކަމަށާއި، މިއީ ތަފާތު 8 މައްސަލައެއްގެ ތެރެއިން އަތުލައިގެންފައިވާ މަސްތުވާތަކެތިކަން މިނިސްޓަރ ހާމަކުރެއްވިއެވެ.
ރާއްޖެއަށް އެތެރެކުރެވޭ މަސްތުވާތަކެތީގެ އިތުރުން، ޤާނޫނާއި ޤަވާއިދާއި ޚިލާފަށް އެތެރެކުރެވޭ އެހެން ބާވަތްތައްވެސް އަތުލައިގަންނަމުންދާކަން ފާހަގަކުރައްވާ މިނިސްޓަރ ވަނީ ވޭތުވެ ދިޔަ ދޮޅު މަސްދުވަހުގެ ތެރޭގައި 7000 ވޭޕް ސްޓިކް އަދި ޤަވާއިދާ ޚިލާފަށް އެތެރެކޮށްފައިވާ 2 މިލިޔަން ސިނގިރޭޓު އަތުލައިގަނެފައިވާކަން ހާމަކުރައްވާފައެވެ.
