ދިވެހިރާއްޖޭގައި ޝީޝާ މަނާކޮށް، ހަކުރާއި ހަކުރު އެކުލެވޭ ބާވަތްތަކުން ޓެކުހެއް ނެގުމާ ގުޅޭގޮތުން ސަރުކާރުން މަޝްވަރާތަކެއް ކުރަމުންދާ ކަމަށް ހެލްތު މިނިސްޓަރު ޢަބްދުﷲ ނާޡިމް އިބްރާހިމް ވިދާޅުވެއްޖެއެވެ.
މިނިސްޓަރު ނާޒިމް މި ބީދައިން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. މިނިސްޓަރު ނާޡިމް ވިދާޅުވީ، މިފަދަ ނިންމުންތައް ނިންމުމުގެ ކުރިން ވިސްނަންޖެހޭ ވަރަށް ގިނަ ކަންކަން ހުންނާނެ ކަމަށާއި، މިފަދަ ކަންކަމަކީ ވަކި އުޞޫލެއްގެ ތެރެއިން އަދި ވަކި ނިޒާމެއްގެ ތެރެއިން، ރައްޔިތުންގެ ދިރިއުޅުމުގެ ވައްޓަފާޅިއާއި ވަރަށް ބޮޑަށް ގުޅި ލާމެހިފައިވާ ކަންތައްތަކަށްވުމުން، އެ ކަންކަމަށް ވަކި އުޞޫލެއްގެ ތެރެއިން ފިޔަވަޅު އެޅުމުގެ މަސައްކަތް ކުރާނެ ކަމަށެވެ.
މިހާތަނަށް ޢާންމު ޞިއްޙަތު ރައްކާތެރިކުރުމަށް ސަރުކާރުން އަޅާފައިވާ ފިޔަވަޅުތަކަށްވެސް މިނިސްޓަރު ވަނީ އަލިއަޅުއްވާލައްވައިފައެވެ. އެގޮތުން ދުންފަތުގެ މައްސަލާގައި އަޅަންޖެހޭ މުހިއްމު ފިޔަވަޅުތައް އަޅައި އެކަމަށް ޚާއްޞަ ޤާނޫނެއް ތަންފީޒުކުރަން ފެށިފައިވާކަން ފާހަގަކުރައްވަމުން މިނިސްޓަރު ވިދާޅުވީ، ވޭޕްގެ ބާވަތްތައް މަނާކުރުމާއި، ޖެނެރޭޝަނަލް ބޭން ތަޢާރަފްކުރުމާއި، ދުންފަތުން ނެގޭ ޓެކުސް ބޮޑުކުރަން ސަރުކާރުން ނިންމި ނިންމުމަކީ މި މަސައްކަތުގެ ދަށުން އެޅުނު މުހިންމު ފިޔަވަޅުތަކެއް ކަމަށެވެ.
”އަޅުގަނޑު ފަހަރެއްގަވެސް ނުދެކެން ކުރިއަށް އޮތް މުސްޠަޤުބަލުގައި ތި ވިދާޅުވާ ހަކުރުގެ މައްސަލައަށް ޙައްލު ނާންނާނެ ކަމަކަށް، އެ މަޝްވަރާތައް އަޅުގަނޑުމެން އެކި ލެވެލްގައި އެބަ ކުރެވޭ، ކިހާ ހިސާބެއްގައި ތޯ މުޅިން ތަންފީޒުވެގެން ދާނީ، އެއީ ކަންނޭނގެ އުފެދޭނެ ސުވާލަކީ. އެންމެ މުހިއްމު ދަނޑިވަޅުގައި، މުހިއްމު ހާލަތުގައި، މުހިއްމު ވަގުތުގައި އެކަންކުރުން ވަރަށް މުހިއްމު،“ މިނިސްޓަރު ވިދާޅުވި ވެ.
މިނިސްޓަރު ނާޡިމް ވިދާޅުވީ މިފަދަ ނިންމުންތަކަކީ މަލްޓި ސެކްޓަރަލް ލެވެލްގައި މަޝްވަރާކޮށްގެން ނިންމަންޖެހޭ ނިންމުންތަކެއް ކަމަށާއި، އެއީ ހެލްތު މިނިސްޓްރީއަށް އެކަނި ނިންމޭނެ ނިންމުންތަކެއް ނޫންކަމަށެވެ. މީގެ އިތުރުން މި އަހަރުގެ ތެރޭގައި ސަރުކާރުން އެންމެ ބޮޑު އިސްކަމެއް ދީގެން ކުރާނެ އެއް މަސައްކަތަކީ މިކަންކަމަށް ޢާންމުން ހޭލުންތެރި ކުރުވުން ކަމަށްވެސް މިނިސްޓަރު ނާޡިމް އިތުރަށް ވިދާޅުވިއެވެ.
