މެދުއިރުމަތީގައި މިހާރު ހިނގަމުންދާ ހަނގުރާމައިގެ ސަބަބުން ބައިނަލްއަޤަވާމީ ތެލުގެ ބާޒާރަށް އައި ލޮޅުންތަކާ ގުޅިގެން، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން ވިއްކާ ތެލުގެ އަގު ބޮޑުކޮށްފިއެވެ.
މިކަމާ ގުޅިގެން އެސްޓީއޯއިން އެކްސްގައި ޚިއްޞާކޮށްފައިވާ ޕޯސްޓެއްގައި ބުނެފައިވަނީ، އެސްޓީއޯގެ ސަބްސިޑަރީއެއްކަމަށްވާ، އެފްއެސްއެމުން ވިއްކާ ތެލުގެ އަގުތަކަށް މިއަދުން ފެށިގެން ބަދަލުތަކެއް ގެނެސްފައިވާ ކަމަށެވެ. އެސްޓީއޯއިން ވަނީ އެ ކުންފުނިން ވިއްކާ ތެލުގެ އަގުތަކަށް އައި ބަދަލުތަކުގެ ތަފްޞީލް ވެސް ޙިއްޞާކޮށްފައެވެ.
އެގޮތުން ކުރިން 13.50 ރުފިޔާއަށް ވިއްކަމުންދިޔަ ޕެޓްރޯލް ލީޓަރެއް މިހާރު ވިއްކަނީ 16.01 ރުފިޔާއެވެ. މިއީ ލީޓަރަކުން 2.51 ރުފިޔާ ނުވަތަ ގާތްގަނޑަކަށް 18.6 އިންސައްތައިގެ އިތުރުވުމެކެވެ. ހަމައެހެންމެ، ކުރިން 13.92 ރުފިޔާއަށް ވިއްކި ޑީސަލް ލީޓަރެއް އަގު މިހާރު ވަނީ 17.54 ރުފިޔާއަށް އުފުލިފައެވެ. މިއީ ލީޓަރަކުން 3.62 ރުފިޔާ ނުވަތަ ގާތްގަނޑަކަށް 26 އިންސައްތައިގެ އިތުރުވުމެކެވެ.
Fuel prices at FSM fuel stations have been revised effective 05 March 2026. ⛽
New pump prices are as follows:
• Petrol: MVR 16.01 per litre (previously MVR 13.50 – increase of MVR 2.51)
• Diesel: MVR 17.54 per litre (previously MVR 13.92 – increase of MVR 3.62) pic.twitter.com/kJub1nqWZ7— STO (@stoplc) March 4, 2026
ފާހަގަކޮށްލެވޭ ގޮތުގައި، ކުރިއަށް އޮތް ދުވަސްތަކުގައި މެދުއިރުމަތީގެ ހާލަތު ޢާންމު ހާލަތަކަށް ރުޖޫޢަ ނުވެއްޖެ ކަމުގައިވާނަމަ ދުނިޔޭގެ ބާޒާރުތަކުގައި ތެލުގެ އަގު މިހާރަށްވުރެ ބޮޑަށް އުފުލިގެންދާނެ ކަމަށް ލަފާކުރެވެއެވެ. މިކަމުގެ ސަބަބުން ރާއްޖެ ފަދަ އެހެން ޤައުމުތަކަށް ތެލަށް ބަރޯސާވެފައިވާ ޤައުމުތަކުގައި، ތެލުގެ އަގު އުފުލި، މުދަލާއި ޚިދުމަތުގެ އަގުތައް އިންތިހާއަށް އުފުލިގެންދާނެއެވެ.
