އިދިކޮޅު އެމްޑީޕީގެ އައު ޗެއާޕާސަން ގަފޫރު ހަވާލުވެ ވަޑައިގެންނެވި ފަހުން އެމްޑީޕީ މިހާރު ބަދަލުވެގެން މިދަނީ ފިނޑި ފިނދަނަ ތަކަކަށް ކަމަށް ރައްޔިތުންގެ މަޖްލީހުގެ ބާރަށު ދާއިރާގެ މެންބަރު އަދި ވެރިކަން ހިންގާ ޕާޓީ ޕީއެންސީގެ ނައިބު ރައީސް އިބްރާޙިމް ޝުޖާއު ވިދާޅުވެއްޖެއެވެ.
ކުރިއަށްއޮތް ލޯކަލް ކައުންސިލްތަކުގެ އިންތިޚާބުގެ ކެމްޕޭނަށް މާލޭގެ މަގުތަކުގައި ދަމާފައިވާ ޕީއެންސީގެ ބެނާތަކެއްގެ ފޮޓޯ ސޯޝަލްމީޑިއާގައި ހިއްސާ ކުރައްވާ ޝުޖާއު ވަނީ އެމްޑީޕީގެ ކުލަ ފަނޑުވެފައިވާ ކަމަށް ވިދާޅުވެ އެ ޕާޓީއަށް ވަރަށް ބޮޑަށް ފާޑުވިދާޅުވެފައެވެ. އެމްޑީޕީއަކީ ފިނޑި ފިނދަނަތަކެއް ގޮތުގައި ސިފަކޮށް ޝުޖާއު ވިދާޅުވީ އެމްޑީޕީގެ ރަންރީނދޫކުލަ ގެއްލިއްޖެ ކަމަށާއި، ރައްޔިތުންގެ މަޤުބޫލުކަން އެޕާޓީއަށް ގެއްލިފައިވާ ކަމަށް ވިދާޅުވެފައެވެ.
ޝުޖާއު ފާހަގަކުރެއްވި ގޮތުގައި އެމްޑީޕީގެ ކެމްޕޭނު ފޯރި ކެނޑި މަޤުބޫލުކަން ގެއްލެންފެށި ހިސާބަކީ އެ ޕާޓީގެ މިހާރުގެ ޗެއާޕާސަން ހަނިމާދޫ ދާއިރާގެ މަޖްލިސް މެންބަރު އަބްދުލް ގަފޫރު މޫސާ އެ މަޤާމާއި ހަވާލުވެ ވަޑައިގެންނެވި ހިސާބުންނެވެ.
”ބަދަލުވެގެން މިދަނީ ފިނޑި ފިނދަނަ ތަކަކަށް.އެއްކަލަ ރަންރީނދޫ ކުލަ ގެއްލިއްޖެ. ރައްޔިތުންގެ މަޤުބޫލުކަން ޕާޓީއަށް ކުޑަވެ،ޕާޓިގެ އަސްލު ސިފަ ގެއްލިއްޖެ. މިހާރު އެމްޑީޕީ މިފެންނަނީ ވަގު ހިޔަޅުތަކެއް އުޅޭގޮތަށް އުޅޭތަން. ޗެއަރ ޕާރސަނަކަށް ޢަބްދުލް ޤަފޫރު އައި ހިސާބުން އެމްޑީޕީ ގެ ކުލަ ފަނޑުވެއްޖެ. ރައްޔިތުންގެ ތާޢީދު ބޮޑުތަނުން ޕާޓީއަށް ގެއްލިއްޖެ“ ޝުޖާއު ވިދާޅުވިއެވެ.
މިއާއިއެކު ޝުޖާއު ވަނީ ކުރިއަށްއޮތް ކައުންސިލް އިންތިޚާބާއިއެކު މަޖްލިސް އަދި ރިޔާސީ އިންތިޚާބު އެެއްދުވަހަކު ބޭއްވުމަށް ތާއީދު ކުރުމަށް ރައްޔިތުންގެ ކިބައިން އެދި ވަޑައިންނަވާފައެވެ.
MDP ބަދަލުވެގެން މިދަނީ ފިނޑި ފިނދަނަ ތަކަކަށް.އެއްކަލަ ރަންރީނދޫ ކުލަ ގެއްލިއްޖެ.ރައްޔިތުންގެ މަޤުބޫލުކަން ޕާޓީއަށް ކުޑަވެ،ޕާޓިގެ އަސްލު ސިފަ ގެއްލިއްޖެ.މިހާރު MDP މިފެންނަނީ ވަގު ހިޔަޅުތަކެއް އުޅޭގޮތަށް އުޅޭތަން.
MDP ޗެއަރ ޕާރސަނަކަށް ޢަބްދުލް ޤަފޫރު @mpgapo އައި ހިސާބުން MDP… pic.twitter.com/V99p2zY1Zj— Ibrahim Shujau (@IbrahimShujaau) March 4, 2026
