މާލޭގެ މަގުތަކުގައި ދިރިއުޅޭ ބުޅާ ގިނަވާ މައްސަލައަށް ޙައްލެއް ހޯދައިދިނުމުގެ ގޮތުން ހުޅުމާލޭ ދެވަނަ ފިޔަވަހީގައި ތަރައްޤީކުރި ”އޮޅުހިޔާ“ އަށް މިހާތަނަށް 350 ބުޅާ ގެންދެވިފައިވާ ކަމަށް އެނިމަލް ވެލްފެއަރ މިނިސްޓަރު ޑރ. މަރްޔަމް މާރިޔާ ވިދާޅުވެއްޖެއެވެ.
މިނިސްޓަރު މާރިޔާ މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. މިނިސްޓަރު ވިދާޅުވީ، އޮޅުހިޔާގައި ވެޓް ކްލިނިކްގެ މަސައްކަތްވެސް ފެށި އެތަނަށް ގެންދެވޭ ބުޅާތައް ނިޔުޓަރ ކުރުމުގެ މަސައްކަތް ފެށިފައިވާ ކަމަށެވެ.
އޮޅުހިޔާއަށް ގެންދެވޭ ބުޅާތަކުގެ ތަފްޞީލް ހާމަކުރައްވަމުން މިނިސްޓަރު މާރިޔާ ވިދާޅުވީ، އޮޅު ހިޔާއަށް ގެންދެވުނު ބުޅާތަކުގެ ތެރެއިން މިހާތަނަށް 60 ބުޅާ ނިޔުޓަރ ކުރެވި، ފަސް އަންހެން ބުޅާ ސްޕޭ ކުރެވިފައިވާ ކަމަށެވެ. މިހާތަނަށް 350 ބުޅާ އޮޅުހިޔާއަށް ގެންދެވިފައިވާކަން ފާހަގަކުރައްވަމުން މިނިސްޓަރު މާރިޔާ ވިދާޅުވީ، އަންނަ ހަފްތާގެ ތެރޭގައި އިތުރު ބުޅާތައް އޮޅުހިޔާއަށް ގެންދިޔުމަށް ހަމަޖެހިފައިވާ ކަމަށެވެ.
އޮޅުހިޔާއަކީ މާލޭގެ މަގުތަކުގައި ދިރިއުޅޭ ބުޅާ ގިނަވާ މައްސަލައަށް ޙައްލެއް ހޯދައިދިނުމުގެ ގޮތުން އެނިމަލް ވެލްފެއަރ މިނިސްޓްރީން، މާލެ ސިޓީ ކައުންސިލާ ހަވާލުކޮށްގެން ތަރައްޤީކުރި ޕެޓް ފެސިލިޓީއެކެވެ. އެތަނުގައި ބުޅާ ކަރަންޓީނު ކުރާނެ ބަޔަކާއި، ވެޓެރިނަރީ ކްލިނިކަކާއި ލެބޯޓްރީއެއްގެ އިތުރުން ފާމަސީއެއްވެސް ޤާއިމްކޮށްފައިވެއެވެ.
އޮޅުހިޔާ ތަރައްޤީކުރުމަށްފަހު ހުޅުވީ 2024 ވަނަ އަހަރުގެ ނޮވެމްބަރު މަހުގެ ދެވަނަ ދުވަހުއެވެ. އެއަށްފަހު އެތަނަށް ބުޅާތައް ގެންދަންފެށީ މިދިޔަ އަހަރުގެ ފެބްރުއަރީ މަހުގެ 28 ވަނަ ދުވަހުއެވެ.
