އަބަދުވެސް ބައްލަވަނީ ރައްޔިތުންނާ ގުޅުންހުރި މައްސަލަތަކަށް ވީހާވެސް އަވަހަކަށް ޙައްލެއް ގެނެސްދެވޭތޯ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ. މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، ސިނަމާލެ އަދި މާލޭހިޔާގެ ކޮންމެ ފުލެޓަކަށް ފައިސާގެ އެހީއެއް ދެއްވުމަށް ނިންމެވި ނިންމެވުމާއި ގުޅިގެން ނޫސްވެރިއަކު އެމަނިކުފާނާ ކުރެއްވި ސުވާލަކަށް ޖަވާބު ދެއްވަމުންނެވެ.
އެ ސުވާލަށް ޖަވާބު ދެއްވަމުން ރައީސް ވިދާޅުވެފައިވަނީ، ސިނަމާލެ އަދި މާލޭހިޔާ ފުލެޓްތަކުގެ ވެރިންނަށް ފައިސާގެ އެހީއެއް ދެއްވުމަށް ނިންމެވީ ލޯކަލް ކައުންސިލްތަކުގެ އިންތިޚާބާ ދިމާކޮށް ނޫންކަމަށެވެ. އެގޮތުން ގަލޮޅު އަވަށުގެ ރައްޔިތުންނާ ބައްދަލުކުރައްވުމަށް ޢިމާދުއްދީން ސްކޫލުގައި ބޭއްވި ޖަލްސާގައި، އެ ފުލެޓްތަކުގެ ވެރިން، އެ ފުލެޓްތަކުގެ ޙާލަތު އެމަނިކުފާނަށް ކިޔައިދެއްވިކަން ފާހަގަކުރައްވަމުން ރައީސް ވިދާޅުވީ އެ ފަރާތްތަކަށް ފައިސާގެ އެހީއެއް ދެއްވުމަކީ ރިޔާސީ އިންތިޚާބުގެ ދުވަސްވަރު އެމަނިކުފާނު ވެލެއްވި ވަޢުދެއް ކަމަށެވެ.
”އެ ބައްދަލުވުމުގައި ރައްޔިތުން އެ ވާހަކަ ދެއްކެވީ، އެ ހިސާބަށްވެސް އަޅުގަނޑު މި ދެންނެވިހެން ރިޔާސީ އިންތިޚާބުން ފެށިގެން އަޅުގަނޑު ވެފަ އޮތް ވަޢުދެއް ފުއްދަން މަސައްކަތް ކުރަމުން މިއައީ، ކައުންސިލުގެ ތެރެއިން އެއްބާރުލުން ނުލިބޭތީ ލަސްވެފަ އޮތީ، އެ ބައްދަލުވުމުގައި އެ ވާހަކަ ނެންގެވީމާ އިތުރު މަސައްކަތްތަކެއް އިތުރު ގިޔަރަކަށް އެކަން އަޅުގަނޑުމެން ލީ، އިތުރު ހިތްވަރެއްލީ ކައުންސިލުން މިކަން ނުކުރިއަސް ސަރުކާރުން އެކަނިވިއަސް ޑައިރެކްޓްލީ އެހީތެރިކަމެއް ދީގެން ނަމަވެސް ކުރަން ބޭނުންވެއޭ އެބަ، އަޅުގަނޑު ބޭނުމެއް ނޫން މި ސަރުކާރަކުން ރައްޔިތުން ބިކަ ޙާލުގައި އުޅޭކަށް،“ – ރައީސް ޑރ. މުޢިއްޒު ވިދާޅުވިއެވެ.
މިއަދުގެ ނޫސްވެރިންގެ ބައްދަލުވުމުގައި ރައީސް ޑރ. މުޢިއްޒު ވަނީ، ސިނަމާލެ އަދި މާލެހިޔާގެ ކޮންމެ ފުލެޓަކަށް ފައިސާގެ އެހީއެއް ދެއްވަން ނިންމެވީ އެތަންތަން މަރާމާތުކުރުމަށް ކަމަށާއި އެއީ ރިޝްވަތު ދިނުންކަމަށް ޤަބޫލުފުޅު ނުކުރައްވާ ކަމަށްވެސް ވިދާޅުވެފައެވެ. ސިނަމާލެ އަދި މާލޭހިޔާގެ ކޮންމެ ފުލެޓަކަށް ފައިސާގެ އެހީއެއް ދިނުމަށް ކެބިނެޓުން ނިންމީ މިދިޔަ ޖަނަވަރީ މަހުގެ ތެރޭގައިކަން ރައީސް ވަނީ ފާހަގަކުރައްވައިފައެވެ.
މީގެ އިތުރުން 1990 ވަނަ އަހަރުން ފެށިގެން ސިނަމާލެ އަދި މާލޭހިޔާގެ ފުލެޓްތަކުގައި މީހުން ދިރިއުޅެން ފެށިފަހުން، އެ ޢިމާރަތްތައް މަރާމާތުކުރުމުގެ މާބޮޑެތި މަސައްކަތަތަކެއް ކުރިއަށް ގެންގޮސްފައިނުވާކަން ފާހަގަކުރައްވަމުން ރައީސް ވިދާޅުވީ، މަރާމާތުނުކޮށް ގިނަ ދުވަސްވުމުގެ ސަބަބުން، ޢިމާރަތްތަކުގެ ޝީޓުތަައް ފަލައިގެން ގޮސް، ތަނބުތަކުގައި ރެނދުލައި އަދި ފާޚާނާތައް ބޭނުންނުކުރެވޭ ވަރަށް ހަލާކުވެފައިވާ ކަމަށާއި، ތަން ހުރީ މީހުންގެ ބޮލަށް ވެއްޓޭނެ ފަދަ ނުރައްކާތެރި ޙާލަތެއްގައި ކަމަށެވެ.
ފާހަގަކޮށްލެވޭ ގޮތުގައި، ސިނަމާލެ އަދި މާލޭހިޔާގެ ކޮންމެ ފުލެޓަކަށް ފައިސާގެ އެހީއެއް ދެއްވުމަކީ ރިޔާސީ އިންތިޚާބުގައި ރައީސް ޑރ. މުޢިއްޒު ވެލެއްވި ވަޢުދެކެވެ. އަދި މިކަން އެމަނިކުފާނުގެ މެނިފެސްޓޯގައިވެސް ހިމަނުއްވާފައިވެއެވެ.
