ފަލަސްޠީނުގެ ރައްޔިތުންނާ ދެކޮޅަށް 77 އަހަރަށްވުރެ ގިނަދުވަސް ވަންދެން ލާއިންސާނީ އެތަށް ޢަމަލުތަކެއް ހިންގަމުން އަންނަ ޔަހޫދީ އިޒުރޭލަކީ ޓެރަރިސްޓް ޤައުމެއް ކަމަށާއި، އިޒުރޭލުން ހުއްޓުމެއް ނެތި ގެންދަނީ ފަލަސްޠީނު ސުންނާފަތި ކުރަމުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ. މުޢިއްޒު މި މޭރުމުން ވިދާޅުވެފައިވަނީ، ރައީސުލްޖުމްހޫރިއްޔާގެ އޮފީހުގައި މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމުގައި މެދުއިރުމަތީގައި އިޒުރޭލާއި އެމެރިކާ ގުޅިގެން ހިންގަމުން އަންނަ ހަމަނުޖެހުންތަކާ ގުޅިގެން، ނޫސްވެރިއަކު އެމަނިކުފާނާ ކުރެއްވި ސުވާލަކަށް ޖަވާބުދެއްވަމުންނެވެ. އެ ސުވާލަށް ޖަވާބުދެއްވަމުން ރައީސް ވިދާޅުވީ، އިޒުރޭލަކީ ޓެރަރިސްޓް ޤައުމެއް ކަމަށާއި އެމެރިކާއިން ދެމުންދާ ހަމަލާތަކަކީވެސް ޓެރަރިސްޓް ހަމަލާތަކެއް ކަމަށެވެ.
މި ހަނގުރާމައިގައި އީރާނުން ދެމުން އަންނަ ހަމަލާތައްވެސް ކުށްވެރިކުރައްވާ ކަމަށާއި، ޖުމްލަކޮށް ހުރިހާ ފަރާތްތަކުންވެސް އެއްބަޔަކު އަނެއް ބަޔަކަށް ދެމުން އަންނަ ހަމަލާތައް ކުށްވެރިކުރައްވާ ކަމަށް އެމަނިކުފާނު ވިދާޅުވިއެވެ.
ހަމައެހެންމެ، މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގައި ގެއްލުން ލިބިފައިވާ ޢަރަބި އިސްލާމީ ޤައުމުތަކުގެ ވެރިންނަށް ގުޅުއްވައި، ރާއްޖެއިން އޮތީ އެ ޤައުމުތަކުގެ ރައްޔިތުންނާ އެކުގައިކަން ހާމަކުރައްވަމުން ގެންދަވާ ކަމަށް ރައީސް ވިދާޅުވިއެވެ. އެގޮތުން މިއަދު އެކަނިވެސް ހަތަރު ޤައުމެއްގެ ވެރިންނަށް ގުޅުއްވުމަށް ހަމަޖެހިފައިވާ ކަމަށް އެމަނިކުފާނު ވިދާޅުވިއެވެ.
މިކަމާ ގުޅިގެން ރައީސް ޑރ. މުޢިއްޒު އިތުރަށް ވިދާޅުވެފައިވަނީ މި މައްސަލައިގައި ސަރުކާރުން މަސައްކަތް ކުރާނީ ޢަރަބި އިސްލާމީ ޤައުމުތަކާ އެކުގައި ކަމަށެވެ.
