މޮރިޝަސްއިން ދިވެހިރާއްޖެއާ އެކުގައި އޮތް ސިޔާސީ ގުޅުން ކަނޑާލުމަކީ ވަރަށް ތާކުންތާކުނުޖެހޭ ބޭކާރު ނިންމުމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިމޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުންނެވެ. އެމަނިކުފާނު ވަނީ، މޮރިޝަސްއިން ރާއްޖެއާއިއެކު އޮތް ސިޔާސީ ގުޅުން ކަނޑާލި ނަމަވެސް މޮރިޝަސްއަށް ޙައްޤުނޫން ތަނެއް މޮރިޝަސްއަށް ޙައްޤުނުވާނެ ކަމަށް ވިދާޅުވެ، އެޤައުމުގެ ނިންމުމަށް ވަރަށް ބޮޑަށް ފާޑުވިދާޅުވެފައެވެ.
ރައީސް ވިދާޅުވީ، އިނގިރޭސިވިލާތުން އެއްވެސް ޤައުމަކަށް ފޯޅަވަހި ހަވާލުކުރާ ކަމަށްވާނަމަ ހަވާލުކުރަންޖެހޭނީ އެތަނުގެ ޙައްޤުވެރި ފަރާތް ކަމަށްވާ ދިވެހިރާއްޖެއަށް ކަމަށެވެ. މި ޙަޤީޤަތް މޮރިޝަސްއަކަށްވެސް ބަދަލެއްނުކުރެވޭނެ ކަމަށް އެމަނިކުފާނު ވަނީ ވިދާޅުވެފައެވެ.
ސިޔާސީ ގުޅުން ކަނޑާލަން މޮރިޝަސްއިން ނިންމީ ރާއްޖެއާއެކު މަޝްވަރާކުރުމެއްވެސް ނެތިކަން ފާހަގަކުރައްވަމުން ރައީސް ވިދާޅުވީ، ރާއްޖެއާއެކު އޮތް ސިޔާސީ ގުޅުން އެޤައުމުން ކަނޑާލި ނަމަވެސް ރާއްޖޭގެ ނިންމުމަކަށް އެއްވެސް ބަދަލެއް ނާންނާނެ ކަމަށާއި، ރާއްޖެ ކުރިއަށްދާނީ ’މޯލްޑިވްސް ފަސްޓް‘ ސިޔާސަތުގެ ދަށުން ކަމަށެވެ.
މޮރިޝަސްއިން ރާއްޖެއާއިއެކު އޮތް ސިޔާސީ ގުޅުން ކަނޑާލާފައި ވަނީ މިދިޔަ މަހުގެ 27 ވަނަ ދުވަހުއެވެ. މޮރިޝަސްއިން ރާއްޖެއާއެކު އޮތް ސިޔާސީ ގުޅުން ކަނޑާލާފައިވަނީ، ރާއްޖެއިން ފޯޅަވަހީގެ މިލްކުވެރިކަމާ މެދު ދަޢުވާކޮށް، އިނގިރޭސިވިލާތުން ފޯޅަވަހި ޖަޒީރާ މޮރިޝަސްއަށް ހަވާލުކުރަން ނިންމި ނިންމުމާ ދެކޮޅަށް ރާއްޖެއިން އަޑުއުފުލަމުން ގެންދާތީއެވެ.
