މީސް މީޑިއާގެ އެކި ޕްލެޓްފޯމް ތަކުގައި، ވަކިން ޚާއްޞަކޮށް ޓިކްޓޮކްގައި ފާޅުކަން ބޮޑުގޮތެއްގައި އިސްލާމް ދީނަށް ފުރައްސާރަކުރާ މައްސަލައާ ގުޅިގެން ޓިކްޓޮކްގައި މަޝްހޫރު އަޙުމަދު އާމިރު ނުވަތަ ”ބޫގާ“ ހޯދަން ދިވެހި ފުލުހުންގެ ޚިދުމަތުން އިޢުލާނު ކުރުމާއިއެކު، އޭނާއަކީ ޕީއެންސީއަށް ތާއީދުކުރާ މީހެއްކަމަށް ދައްކާ ރައްޔިތުންނަށް އޮޅުވާލާ ޕީއެންސީގެ އަގު ވައްޓާލުމުގެ މަސައްކަތް ފަށައިފިއެވެ.
ޚާއްޞަކޮށް ޕީއެންސީގެ ޓިކެޓުގައި މާލޭގެ މޭޔަރުކަމަށް ވާދަކުރައްވާ ކެންޑިޑޭޓް މޫސާ ޖަލީލަށް ތާއީދުކުރާ ކަމަށްބުނެ ޕީއެންސީގެ ހުއްދައެއްނެތި އެ ޕާޓީގެ ކެމްޕޭނު ޕޯސްޓަރުތައް ބޭނުންކޮށްގެން ބޫގާ ދަނީ ސޯޝަލްމީޑިއާގައި އެކިކަހަލަ ވީޑިއޯތައް ހަދަމުންނެވެ. އޭނާ މިކަން ފެށީ އިސްލާމްދީނަށް ފުރައްސާރަކުރި މައްސަލައިގައި ދިެވހި ފުލުހުން އޭނާ ހޯދާ ތަޙުޤީޤަށް ހާޒިރު ކުރުމަށް އެންގުމުން އެކަމުގެ ރުޅީގައި ކަމަށް ބެލެވެއެވެ.
މިކަމާއި ގުޅިގެން ”އެކިއެމްވީ“ އިން ކުރި ސުވާލެއްގެ ޖަވާބުގައި ޕީއެންސީގެ ކެމްޕޭން ޓީމުގެ އިސް އޮފިޝަލަކު ވިދާޅުވީ އެއީ ޕީއެންސީގެ ތާއީދުއޮވެގެން ނުވަތަ ޕީއެންސީއަށް އެނގިގެން ހިނގާ ކަމެއް ނޫން ކަމަށާއި، އެއީ އޭނާގެ އަމިއްލަ ޚިޔާލުކަމަށެވެ. އަދި އިސްލާމްދީނަށް ފުރައްސާރަ ކުރާ އެއްވެސް ބަޔަކާއެކު ޕީއެންސީން މަސައްކަތް ނުކުރާނެ ކަމުގެ ޔަޤީންކަންވެސް އޭނާ ވަނީ ދެއްވާފައެވެ.
“ އެއްގޮތަކަށްވެސް ޕީއެންސީން ހުއްދަދީގެން، ނުވަތަ މިޕާޓީއަށް އެނގިގެން ހިނގާކަމެއްނޫން، މޫސާ ޖަލީލްއަށްވެސް އެނގިގެން ހިނގާ ކަމެއްނޫން، ތިކަމުގެ ޒިންމާ ނަގާނީ އެވާހަކައެއް ދައްކާފަރާތަކުން، އެއީ އޭނާގެ އަމިއްލަކަމެއް. ދީނަށް ފުރައްސާރަ ކުރާމީހުންނާއެކު ޕީއެންސީން މަސައްކަތެއް ނުކުރާނެ“ : ޕީއެންސީ ކެމްޕޭން ޓީމުން ވިދާޅުވިއެވެ.
އޭނާ ހޯދުމަށް ފުލުހުން މީގެ 4 ދުވަސް ކުރިން ކުރި އިޢުލާނުގައިވާ ބުނެފައިވަނީ، އަޙްމަދު އާމިރު، ހ. ފިލިކުރިގެ / ކ. މާލެ (51އ) ހޯދަން އިޢުލާނުކުރީ މީސް މީޑިއާގެ އެކި މަންސަތަކުގައި އިސްލާމް ދީނަށް ތައުހީނުކޮށް، ދިވެހި ރައްޔިތުންގެ ދީނީ އެއްބައިވަންތަ ކަމަށް ބުރޫއަރާ ފަދަ ވާހަކަތައް ދެއްކުމާއި، އިސްލާމިކް މިނިސްޓްރީ އުވާލުމަށް ގޮވާލައި ވާހަކަ ދައްކާފައިވާ މައްސަލައާ ގުޅިގެން ކަމަށެވެ.
ފުލުހުން ބުނީ ތަޙުޤީޤު ކުރަމުންދާ މައްސަލައެއްގެ ތަޙުޤީޤަށް ހާޒިރުކުރަން ބޭނުންވެ، އުޅޭ ވަކި ތަނެއް ނޭނގުމުގެ ސަބަބުން، ތަޙުޤީޤަށް ހާޒިރުވުމަށް ބޫގާއަށް ޗިޓު ރައްދު ކުރެވިފައިނުވާ ކަމަށެވެ. އެހެންކަމުން އަންނަ މާރިޗު މަހުގެ 10 ވަނަ ދުވަހުގެ ހަވީރު 16:00 އަށް ސަރޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގއަށް އާމިރު ހާޒިރުވުމަށް ފުލުހުން ވަނީ އަންގައިފައެވެ.
”އެކި އެމްވީ“ އަށް އެނގިފައިވާ ގޮތުގައި ބޫގާ މިހާރު ދިރިއުޅެނީ ޖަޕާނު މީހަކާ އިނދެގެން އެ ޤައުމުގައެވެ.
