ދިވެހި ފުލުހުންގެ ޚިދުމަތުން އާންމު ރައްޔިތުންނާ ގާތުން ބައްދަލުކޮށް، ޚިޔާލު ހޯދުމަށް ކުރިއަށްގެންދާ ”ވޯކް އެންޑް ޓޯކް“ ހަރަކާތް މިއަދު ކުރިއަށް ގެންގޮސްފިއެވެ.
މި ހަރަކާތް ކުރިއަށްގެންގޮސްފައިވަނީ މިއަދު، ހަވީރު 4:30 އިން 5:30 އަށް، މާލެ, ވިލިމާލެ، އަދި ހުޅުމާލޭގެ އެކި ސަރަޙައްދުތަކުގައެވެ. އަދި މި ހަރަކާތުގެ ތެރެއިން މިއަދު 100 ސަރަޙަދަކުން ގިނަ ރައްޔިތުންނާއި ބައްދަލުކޮށް، ޚިޔާލާއި މަޝްވަރާ ފުލުހުން ވަނީ ހޯއްދަވާފައެވެ.
މިއަދު މާލޭގައި ކުރިއަށް ގެންދިޔަ ވޯކް އެންޑް ޓޯކް ހަރަކާތުގެ ތެރެއިން.
މި ހަރަކާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ އާއި ފުލުހުންގެ އިސް އޮފިސަރުން ބައިވެރިވެލެއްވި. މި ހަރަކާތުގެ ތެރެއިން ރައްޔިތުންނާ ގާތުން ބައްދަލުކޮށް، އެފަރާތްތަކުގެ ހާލުބަލައި، ހުރި… pic.twitter.com/KcK1SEHZKV
— Maldives Police (@PoliceMv) February 28, 2026
މި ހަރަކާތާއިބެހޭގޮތުން ފުލުހުންގެ ތަރުޖަމާނު އެސިސްޓެންޓް ކޮމިޝަނަރ އޮފް ޕޮލިސް ޝިފާން ވިދާޅުވީ މި ޕްރޮގްރާމަކީ ރައްޔިތުންނާއި ކައިރިން ފުލުހުންނާއި ރައްޔިތުން ހިމެނޭހެން ރަނގަޅުކުރަން ހުރިކަންކަން އިތުރަށް ދެނެގަނެ، ކަންކަން އޮޅުންފިލުވާ، އެކަންކަމާ މަޝްވަރާކުރުމަށްޓަކާ، ޚާޢްޞަކޮށް ފުލުހުންގެ ސީނިއާ ހުރިހާ ފުލުހުންވެސް ހިމެނޭ ގޮތަށް ގެންދެވޭ އިވެންޓެއް ކަމަށެވެ. އަދި ފުލުހުންނާއި ރައްޔިތުންނާ ދެމެދު އޮންނަ ގުޅުން ބަދަހިކޮށް، އާންމުންގެ ޚިޔާލާއި ކަންބޮޑުވުންތައް ދެނެގަތުމަކީވެސް މި ހަރަކާތުގެ އެއް މަޤުސަދު ކަމަށް ވިދާޅުވިއެވެ.
”މި ޕްރޮގްރާމަކީ ރައްޔިތުންނާއި ކައިރިން އަޅުގަނޑުމެން ދެބައިމީހުންވެގެން ހުރިކަންކަން އިތުރަށް ދެނެގަނެ، ކަންކަން އޮޅުންފިލުވާ، އެކަންކަމާ މަޝްވަރާކުރުމަށްޓަކާ، ޚާޢްޞަކޮށް ފުލުހުންގެ ސީނިއާ ހުރިހާ ފުލުހުންވެސް ހިމެނޭ ގޮތަށް ގެންދެވޭ އިވެންޓެއް“ ޝިފާން ވިދާޅުވިއެވެ.
މިއަދުގެ ހަރަކާތުގައި ގާތްގަނޑަކަށް 250 އެއްހާ ފުލުހުން ވަނީ ބައިވެރިވެފައެވެ. އާންމުންގެ ފަރާތުން މި ހަރަކާތަށް ބޮޑު ތަރުޙީބެއް ލިބިގެންގޮސްފައިވާއިރު، ފުލުހުން ބުނީ މި ޙަރަކާތް ކުރިއަށް އޮތްތަނުގައި މުޅި ރާއްޖެއަށް ފުޅާކުރުމަށް މަސައްކަތް ފަށާފައިވާ ކަމަށެވެ. އެގޮތުން އަންނަ މާޗްމަހު މުޅި ރާއްޖޭގައި މި ހަރަކާތް ފެށުމަށް ފުލުހުން ދަނީ ތައްޔާރުވަމުންނެވެ.
ފާހަގަކޮށްލެވޭ ގޮތުގައި ދިވެހިފުލުހުންގެ ޚިދުމަތުން ދަނީ މުޅިރާއްޖޭގައިވެސް މިފަދަ އެކި ކަހަލަ ޕްރޮގްރާމްތައް ހިންގާ ރަައްޔިތުން ހޭލުންތެރި ކުރުމުގެ ގިނަގުނަ މަސައްކަތްތަކެއް ކުރައްވަމުންނެވެ.
