މެދު އިރުމަތީގައި މިހާރު ހިނގަމުންދާ ހަނގުރާމައާއި ގުޅިގެން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ޓްރަވަލް އެޑްވައިޒަރީއެއް ނެރެފިއެވެ.
އެމްއޭސީއެލް އިން ނެރެފައިވާ މި ޓްރެވަލް އެޑްވައިޒަރީގައި، މެދު އިރުމަތީގެ ގިނަ ޤައުމުތަކެއްގެ ވައިގެ ސަރަޙައްދު ބަންދުކުރުމާއި ގުޅިގެން އެސަރަޙައްދުގެ ޤައުމުތަކަށް ދަތުރުކުރާ ފަރާތްތަކުން އެއަރޕޯޓަށް ދިއުމުގެ ކުރިން އެ ފަރާތަކުން ފުރުމަށް ހަމަޖެހިފައިވާ ފްލައިޓުގެ މަޢުލޫމާތު ސާފުކުރުމަށް ވަނީ އިލްތިމާސްކޮށްފައެވެ.
އެމްއޭސީއެލްއިން ވަނީ ފަސިންޖަރުން ދަތުރުކުރާ އެއަރލައިންގެ ވެބްސައިޓް ނުވަތަ މޮބައިލް އެޕްލިކޭޝަން މެދުވެރިކޮށް ދަތުރުގެ އެންމެފަހުގެ މަޢުލޫމާތު ހޯދުމަށް އެދިފައެވެ. މީގެ އިތުރުން ޓުއަރ އޮޕަރޭޓަރުން މެދުވެރިކޮށް ދަތުރު އަދި ފްލައިޓުތަކުގެ މަޢުލޫމާތު ހޯދުމާއެކު، އެފަރާތްތަކުން ފޯރުކޮށްދޭ އިރުޝާދުތަކަށް ތަބާވުމަށާއި ދަތުރުގެ ކަންކަން ދުރާލާ ކުރިން ރޭވުމަށް އެމްއޭސީއެލް އިން ވަނީ އަންގައިފައެވެ.
މެދު އިރުމަތީގެ ވައިގެ ސަރަޙައްދު ބަންދުކޮށްފައިވަނީ އިޒުރޭލާއި އެމެރިކާ ގުޅިގެން އީރާނަށް ދިން ހަމަލާތަކާއެކު، ރައްދުގައި އީރާނުން ދޭން ފެށި މިސައިލް ހަމަލާތަކާ ގުޅިގެންނެވެ. ގަލްފް ނިއުސްގައި ރިޕޯޓުކޮށްފައިވާ ގޮތުގައި އީރާނުގެ މި ރައްދު ހަމަލާތަކުގެ ސަބަބުން ގަލްފްގެ ގިނަ ޤައުމުތަކުން ވަނީ އެޤައުމުތަކުގެ ވައިގެ ސަރަޙައްދު ބަންދުކޮށްފައެވެ. އޭގެތެރޭގައި ޔޫއޭއީ، ޤަތަރު، ކުވައިތު، ބަޙްރެއިންގެ އިތުރުން ޢިރާޤުން ވަނީ އެޤައުމުތަކުގެ ވައިގެ ސަރަޙައްދު ބަންދުކޮށްފައެވެ.
އީރާނުގެ ރައްދު ހަމަލާތަކާއި ގުޅިގެން މުޅި މެދު އިރުމަތީގެ ވައިގެ ދަތުރުތަކައް ވަނީ ބުރޫ އަރައިފައެވެ. ވައިގެ ސަރަޙައްދު ބަންދުކުރުމާއި ގުޅިގެން އެއަރލައިންތަކަށް ވަނީ ފްލައިޓުތައް ކެންސަލް ކުރަން މަޖުބޫރުވެފައެވެ. ދަތުރުތައް މެދުކަނޑާލި އެއާލައިންތަކުގެ ތެރޭގައި އެމިރޭޓްސް އަދި ޤަތަރު އެއަރވޭސް ހިމެނެއެވެ.
އަލް-ޖަޒީރާގައި ރިޕޯޓް ކޮށްފައިވާ ގޮތުގައި، މެދު އިރުމަތީގައި ހުރި އެމެރިކާގެ އަސްކަރީ މަރުކަޒުތަކަށާއި އެމެރިކާއާއި ގުޅުން ހުރި ތަންތަނަށް އަމާޒުކޮށް އީރާނުން ރައްދުގައި ވަނީ މިސައިލް އަދި ޑްރޯން ހަމަލާތަކެއް އަމާޒުކޮށްފައެވެ. އެގޮތުން، ޤަތަރާއި، ޔޫއޭއީ، ބަޙްރެއިން، ކުވައިތު، ސޫރިޔާ، ޢުރުދުންގެ އިތުރުން ޢިރާޤުގައި ހުންނަ މިފަދަ ތަންތަން ހިމެނެއެވެ.
