މިވަގުތު ހަނގުރާމައިގެ ޙާލަތު ގޯސްވެފައިވާ މެދު އިރުމަތީގެ އެކި ޤައުމުތަކުގައި ދިރިއުޅޭ ދިވެހިންގެ ކަންކަން ވަރަށް ގާތުން ބަލަމުން އަންނަ ކަމަށް މިނިސްޓްރީ އޮފް ފޮރިން އެފެއަރޒް އިން ބުނެފިއެވެ.
މެދު އިރުމަތީގައި މިއަދު ފަށާފައިވާ ހަނގުރާމައާ ގުޅިގެން، އެސަރަޙައްދުގެ ޤައުމުތަކުގައި ދިރިއުޅޭ އަދި ދަތުރުކުރާ އެންމެހައި ދިވެހިން ސަލާމަތާ ރައްކާތެރިކަމަށް އަހައްމިއްޔަތުކަން ދިނުމަށް އިލްތިމާސްކުރާ ކަމަށް ފޮރިން މިނިސްޓްރީން ނެރެފައިވާ ނޫސްބަޔާނެއްގައި ވަނީ ބުނެފައެވެ. މީގެ އިތުރުން އެސަރަޙައްދުގެ ޤައުމުތަކުގައި ދިރިއުޅޭ ދިވެހިން އެޤައުމެއްގެ ސަރުކާރުން ޢާންމުންގެ ސަލާމަތާ ރައްކާތެރިކަމަށްދޭ އިރުޝާދުތަކާ އެއްގޮތަށް ޢަމަލުކުރުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ. ވަކިން ޚާއްޞަކޮށް ބޭރުތެރެއަށް ނުކުމެ އުޅުން ވީހާވެސް މަދުކުރުމަށް އެމިނިސްޓްރީން އެދިފައިވެއެވެ.
ފޮރިން މިނިސްޓްރީން ބުނެފައިވަނީ، އެސަރަޙައްދުގައި މިވަގުތު ތިބި ދިވެހިންގެ ޙާލަތު، މިނިސްޓްރީއާއި މެދު އިރުމަތީގައި ހުންނަ ދިވެހިރާއްޖޭގެ އެމްބަސީތަކުން ވަރަށް ގާތުން ބަލަމުން އަންނަ ކަމަށެވެ. މީގެ އިތުރުން ބޭނުންވެއްޖެ ހިނދެއްގައި ކޮންސިއުލަރ އެހީތެރިކަން ފޯރުކޮށްދިނުމަށް މަގުފަހިކުރުމުގެ ގޮތުން، އެ ސަރަޙައްދުގައި ދިރިއުޅޭ އެންމެހައި ދިވެހިން ވީ އެންމެ އަވަހަކަށް އެންމެ ކައިރީގައި ހުރި ދިވެހިރާއްޖޭގެ އެމްބަސީއެއްގައި ރަޖިސްޓްރީވުމަށް ފޮރިން މިނިސްޓްރީން ވަނީ އެދިފައެވެ.
އިޒުރޭލާއި އެމެރިކާ ގުޅިގެން އީރާނަށް ދިން ހަމަލާތަކާއެކު، ރައްދުގައި އީރާނުން ވަނީ މިސައިލް ހަމަލާތަކެއް މެދު އިރުމަތީގައި ހުންނަ އެމެރިކާގެ އަސްކަރީ މަރުކަޒުތަކާއި އެމެރިކާއާއި ގުޅުން ހުރި ތަންތަނަށް ދީފައެވެ. މިކަމުގެ ސަބަބުން މުޅި މެދު އިރުމަތީގެ ވައިގެ ސަރަޙައްދު އެއްކޮށް ބަންދުކޮށް، އެއަރލައިންތަކުން ކުރާ ދަތުރުތައްވެސް މިހާރު ވަނީ ކެންސަލްކުރަން މަޖުބޫރުވެފައެވެ.
އަލް-ޖަޒީރާގައި ރިޕޯޓް ކޮށްފައިވާ ގޮތުގައި، މެދު އިރުމަތީގައި ހުރި އެމެރިކާގެ އަސްކަރީ މަރުކަޒުތަކަށާއި އެމެރިކާއާއި ގުޅުން ހުރި ތަންތަނަށް އަމާޒުކޮށް އީރާނުން ރައްދުގައި ވަނީ މިސައިލް އަދި ޑްރޯން ހަމަލާތަކެއް އަމާޒުކޮށްފައެވެ. އެގޮތުން، ޤަތަރާއި، ޔޫއޭއީ، ބަޙްރެއިން، ކުވައިތު، ސޫރިޔާ، ޢުރުދުންގެ އިތުރުން ޢިރާޤުގައި ހުންނަ މިފަދަ ތަންތަން ހިމެނެއެވެ.
