އިޒްރޭލާއި އެމެރިކާ ގުޅިގެން އީރާނަށް ދިން ވަރުގަދަ މިސައިލް ހަމަލާތަކާއި ގުޅިގެން ރައްދުގައި އީރާނުންވެސް އިޒުރޭލަށާއި މެދު އިރުމަތީގައި ހުރި އެމެރިކާގެ އަސްކަރީ މަރުކަރުތަކަކަށް މިސައިލް އަދި ޑްރޯން ހަމަލާތަކެއް އަމާޒުކޮށްފިއެވެ.
އަލް-ޖަޒީރާގައި ރިޕޯޓް ކޮށްފައިވާ ގޮތުގައި، ތިން ޤައުމެއްގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް އީރާނުން ވަނީ ރައްދުގައި ހަމަލާތައް އަމާޒުކޮށްފައެވެ. އެޤައުމުތަކަކީ ޤަތަރާއި، ޔޫއޭއީގެ އިތުރުން ބަޙްރެއިނެވެ. މީގެ އިތުރުން ސަޢޫދީ ޢަރަބިއްޔާއިން ވެސް ބާރު ގޮވުންތަކުގެ އަޑުތައް އިވޭ ކަމަށް ރިޕޯޓުކޮށްފައިވެއެވެ.
އިޒުރޭލުން އިސްވެ ތިބެ އީރާނަށް ހަމަލާ ދިނުމާ ގުޅިގެން، އީރާނުން ވަނީ ރައްދުގައި ހަނދާނުން ނުފިލާނެވަރުގެ ވަރުގަދަ ހަމަލާތަކެއް އިޒުރޭލަށް ދޭނެ ކަމަށް ބުނެފައެވެ. އެގޮތުން އީރާނުގެ ޤާނޫނު ހަދާ މަޖިލީހުގެ ޤައުމީ ސަލާމަތާ ބެހޭ ކޮމިޝަންގެ ވެރިޔާ އިބްރާހިމް ޢަޒީޒީ ވިދާޅުވީ ”އަހަރެމެން ކަލޭމެނަށް އިންޒާރު“ ދީފައިވާނެ ކަމަށެވެ.
މިހަމަލާތަކުގައި އީރާނުގެ ރޫޙާނީ ލީޑަރު އާޔަތުﷲ ޢަލީ ޚާމަނާއީގެ އޮފީސް ހިމެނޭ ސަރަޙައްދަށް އިޒުރޭލުން މިސައިލް ހަމަލާތަކެއް ދީފައިވެއެވެ. ނަމަވެސް އެ ވަގުތު ޚާމަނާއީ ތެހެރާނުގައި ވެސް ނޫޅުއްވައެވެ. ދަ އެސޯސިއޭޓެޑް ޕްރެސް ނިއުސް އޭޖެންސީން ރިޕޯޓް ކޮށްފައިވާ ގޮތުގައި ޚާމަނާއީ މިހާރު ހުންނެވީ ރައްކާތެރި ސަރަޙައްދެއްގައެވެ.
މީގެ އިތުރުން އިޒުރޭލުން ވަނީ ތެހެރާނުގައި ހުންނަ އީރާނުގެ ރައީސް މަސްޢޫދު ޕެޒެޝްކިއަން ދިރިއުޅުއްވާ ރިޔާސީ ގަނޑުވަރަށްވެސް ހަމަލާތަކެއް އަމާޒުކޮށްފައެވެ. މިއީ ރައީސް މަސްޢޫދު ޕެޒެޝްކިއަން އަވަހާރަކޮށްލުމުގެ ނިޔަތުގައި އިޒުރޭލާއި އެމެރިކާ ގުޅިގެން، ދުރާލާ ރާވައިގެން ދީފައިވާ ހަމަލާތަކެއް ނަމަވެސް އިޒުރޭލުގެ މި ހަމަލާތަކުގައި ރައީސް މަސްޢޫދު ޕެޒެޝްކިއަން އަވަހާރަވެފައެއްނުވެއެވެ. އޭނާވެސް މިހާރު ހުންނެވީ ރައްކާތެރި ސަރަޙައްދެއްގައެވެ.
އީރާނުގެ ރައްދު ހަމަލާތަކާއި ގުޅިގެން މުޅި މެދު އިރުމަތީގެ ވައިގެ ދަތުރުތަކައް ވަނީ ބުރޫ އަރައިފައެވެ.
