ފުލުހުންގެ ދައުރު އަދާކުރުމަށް ހުރަސް އެޅުމުގެ ތުޙުމަތުގައި، ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޛާކިރާއި އެމްޑީޕީގެ އެކްޓިވިސްޓް ފާތިމަތު ޒަހިއްޔާގެ މައްޗަށް ދަޢުވާ ކޮށްދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އޮފީހަށް ފުލުހުން މައްސަލަ ހުށަހަޅައިފިއެވެ.
މި މައްސަލާގައި މަޢުރޫފާއި ޒަހިއްޔާގެ އިތުރުން އިތުރު މީހެއްގެ މައްޗަށް ދަޢުވާކުރަން ފުލުހުން ވަނީ ފޮނުވައިފައެވެ. އެއީ ޢަބްދުއްސަލާމް، މާފޮޅޭވިލާ / ނ. ހޮޅުދޫ އެވެ.
މިމައްސަލައިގެ ތަޙުޤީޤު ނިންމައި ޕީޖީ އޮފީހަށް ހުށަހަޅާފައިވަނީ މިދިޔަ ހަފްތާގެ ބުރާސްފަތި ދުވަހުއެވެ. މި އެންމެންގެ މައްޗަށްވެސް ފުލުހުން އުފުލާފައިވަނީ ޣައިރު ޤާނޫނީ އެއްވުމެއް ރޫޅާލުމަށް ހުރަސްއެޅުމުގެ ކުށުގެ ދަޢުވާއެވެ.
ފާހަގަކޮށްލެވޭ ގޮތުގައި މި ތިން މީހުން ވަނީ މިދިޔަ އަހަރުގެ އޮކްޓޫބަރު މަހުގެ ތިންވަނަ ދުވަހުގެ ރޭ އެމްޑީޕީން ބޭއްވި އެއްވުމުގައި، އެއްވެ އުޅުމުގެ ޤާނޫނާއި ޚިލާފަށް މާލޭގެ މަގުތައްމަތި ހަލަބޮލު ކުރުމުގައި އެންމެ އިސް ސަފުގައި ހަރަކާތްތެރިވެފައެވެ. މީގެ އިތުރުން ފުލުހުންގެ ދައުރު އަދާކުރުމަށް ހުރަސްއަޅައި، އަމުރަށް ނުކިޔަމަންތެރިވެ، ފުލުހުންގެ ވާޖިބު އަދާކުރުމަށް މި ތިން މީހުން ވަނީ ހުރަސް އަޅައިފައެވެ.
އިހުތިޖާޖުކުރުމުގެ ނަމުގައި އެމްޑީޕީން އެރޭ ހިންގި ހަމަނުޖެހުންތަކާއި ގުޅިގެން މެންބަރު މައުރޫފާއި އެމްޑީޕީގެ އެކްޓިވިސްޓް ޒަހިއްޔާއާއި ސަލާމްގެ އިތުރުން އިތުރު ބަޔަކު ވެސް ހައްޔަރުކޮށްފައިވެއެވެ.
