ނިމިދިޔަ އެމްޑީޕީ ސަރުކާރުން ހިއްކަން ފަށައި މަސައްކަތް ނުނިންމުނު، ވިލުފުށީ އެއަރޕޯޓަށް ބޭނުންވާ ބިން ހިއްކުމުގެ މަޝްރޫޢުގެ ބޮޑު ބައެއް މިސަރުކާރުން ނިންމާލައިފިއެވެ.
ވިލުފުށީ ބިން ހިއްކުމުގެ މަސައްކަތް ކުރިއަށްގެންދާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މީޑިއާތަކަށް ފޮނުވި މެސެޖެއްގައި ބުނެފައިވަނީ، ވިލުފުށީ ބިން ހިއްކުމުގެ މަޝްރޫޢުގެ ދަށުން ހިއްކަންޖެހޭ 81 ހެކްޓަރުގެ ތެރެއިން މިހާތަނަށް 79 ހެކްތަރުގެ ބިން އެއްކޮށް ހިއްކައި ނިންމާލެވިފައިވާ ކަމަށެވެ. އެއީ މަޝްރޫޢުގެ 98 އިންސައްތަ މަސައްކަތެވެ.
އެމްއޭސީއެލް އިން މަޢުލޫމާތުދޭ ގޮތުގައި، ވިލުފުށީ ބިން ހިއްކުމުގެ މަސައްކަތް ކުރިއަށްގެންދަނީ ފިލިޕޯ ބްރޫނެލެޝީ ނަމަކަށް ކިޔާ ޑްރެޖަރެއް ބޭނުންކޮށްގެންނެވެ. އެއީ ޖުމްލަ 11،300 ކިއުބިކް މީޓަރުގެ ވެލި ނެގުމުގެ ކެޕޭސިޓީ ހުންނަ ޑްރެޖަރެވެ.
ވިލުފުށީ އެއަރޕޯޓްގެ ބިން ހިއްކުމުގެ މަސައްކަތް މި ސަރުކާރުން އަލުން ފަށާފައިވަނީ 14 ނޮވެމްބަރު 2025 ވަނަ ދުވަހުއެވެ.
ފާހަގަކޮށްލެވޭ ގޮތުގައި ނިމިދިޔަ އެމްޑީޕީ ސަރުކާރުން ވިލުފުށީގައި އެއަރޕޯޓެއް ތަރައްޤީކުރުމުގެ ނަމުގައި 2023 ވަނަ އަހަރު ރިޔާސީ އިންތިޚާބަށް ކަޑަޖެހުމުގެ ގޮތުން ވަނީ އެއްވެސް ސަރވޭއެއް ހެދުމެއް ނެތި ބިން ހިއްކުމުގެ މަސައްކަތް ފަށައިފައެވެ. ނަމަވެސް އަދުގެ ސަރުކާރުން ވެރިކަމާ ހަވާލުވެ މަސައްކަތް އަލުން ފަށައި މިހާ ކުޑަ ދުވަސްކޮޅެއްގެ ތެރޭގައި މިވަނީ މަސައްކަތް ނިންމާލުމާ ގާތްކޮށްފައެވެ.
