މާލޭގެ ބޮޑުތަކުރުފާނު މަގު ބްރިޖް ލައިޓް ކައިރިން ބާރު ސްޕީޑްގައި ދުއްވި ސައިކަލެއް ޕޭމެންޓް މައްޗަށް އަރައި ހިނގި އެކްސިޑެންޓެއްގައި، ސައިކަލު ފަހަތުގައި ކުއްޖަކު ނިޔާވި މައްސަލައާ ގުޅިގެން ހައްޔަރުކުރި ޒުވާނާ ޝަރުތުތަކާއެެކު ބަންދުން ދޫކޮށްލައިފިއެވެ.
މި އެކްސިޑެންޓް ހިނގިއިރު ސައިކަލު ދުއްވަން އިނީ 19 އަހަރުގެ ފިރިހެނެކެވެ. އޭނާ ހައްޔަރު ކުރުމަށްފަހު އިއްޔެ ބަންދުން ދޫކޮށްލީ ޝަރުތުތަކާއިއެކުގައެވެ.
އޭނާގެ ފަހަތުގައި އިނީ 16 އަހަރުގެ ފިރިހެން ކުއްޖެކެވެ. މި ދެ މީހުންނަކީވެސް ދިވެހިންނެވެ. މި ދެ މީހުންނަށްވެސް އަނިޔާވެގެން ހޮސްޕިޓަލަށް ގެންދިޔައެވެ. އަދި ސައިކަލުގެ ފަހަތުގައި އިން އެ ކުއްޖާއަށް ފަރުވާދެމުން ދަނިކޮށް ވަނީ ނިޔާވެފައެވެ.
އޭނާއާ ގުޅޭ ބަންދު އަމުރުގައި ބުނީ، ކުށުގެ ތުހުމަތުކުރެވޭ މިންވަރުގެ ހެކި ހުށަހަޅާފައިވާ ކަމަށެވެ.
މި މައްސަލާގައި އޭނާ ޝަރުތުކޮށް ބަންދުން ދޫކޮށް ދިނުމަށް އެދުނުއިރު، މިކަން ހިނގާފައިވަނީ ގަސްދުގައި ނޫން ކަަމަށްވެސް އޭނާ ބުނެފައި ވެއެވެ.
އަދި ދެ ރައްޓެހިން ސައިކަލުގައި ދަނިކޮށް މިހާދިސާ ހިނގީ ކަމަަށް އޭނާ ބުނެފައި ވެއެވެ. މިކަން މިހެން ހިނގީތީ ހިތާމަކުރާ ކަމަށްވެސް އޭނާ ބުނިއިރު، މައްސަލައިގައި ކަން ހިނގާފައިވާ ގޮތަށް ބަލައި ހަރުކަށި ޝަރުޠު ތަކާއިއެކު ބަންދުން ދޫކޮށްލުމަށް އޭނާ ވަނީ އެދިފައެވެ.
މިއާއެކު ފުލުހުން ވަނީ އޭނާއަށް ލިބިފައިވާ އަނިޔާތަކަށްވެސް ރިއާޔަތްކޮށް، ހަރުކަށި ޝަރުއު ތަކާއެކު ފުލުހުންނަށް ފުރިހަމައަށް އެއްބާރުލުން ދޭނަމަ ބަންދުން ދޫކުރުމަށް ފުލުހުންގެ ފަރާތުން އިޢުތިރާޟް ނުކުރާކަމަށް ވިދާޅުވެފައެވެ.
އަދި މިކަންކަމަށް ރިއާޔަތްކޮށް، އޭނާ ޝަރުތުތަކަކާއެކު ބަންދުން ދޫކޮށްލުމަށް ކޯޓުން ވަނީ ނިންމައިފައެވެ.
