ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މޭޔަރުކަމުގައި ހުންނެވި ދުވަސްވަރު އެކުލަވާލާ ފާސްކުރި ސްޓްރެޓެޖިކް އެކްޝަން ޕްލޭން (އެސްއޭޕީ) ހުއްޓިފައި އޮންނަތާ ދެ އަހަރުވެފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މި މޭރުމުން ވިދާޅުވީ، ރޭ އާޓިފިޝަލް ބީޗުގައި ޕީއެންސީގެ ސަޕޯޓަރުންނާއެކު ބޭއްވި ތަރާވީހެއްގައި ވާހަކަފުޅުދައްކަވަމުންނެވެ. މާލޭ ސިޓީ ކައުންސިލުގައި ހުންނެވި ދުވަސްވަރު އެކުލަވާލާ ފާސްކުރި ސްޓްރެޓެޖިކް އެކްޝަން ޕްލޭނާއެއްގޮތަށް މަސައްކަތްތައް ނުހިނގާކަން ފާހަގަކުރައްވަމުން ރައީސް ވިދާޅުވީ، ޕްލޭނުގައި ފާހަގަކޮށްފައިވާ ކަންކަން ކުރަން ރައްޔިތުން ޙަވާލުކުރި ކައުންސިލުގެ ދައުރު އަދިވެސް ނުނިމޭ ކަމަށެވެ.
މިކަންކަން މިމަގުން ހިނގަމުންދިޔަ ނަމަވެސް ޕީއެންސީއަށް ނިސްބަތްވާ ކައުންސިލަރުންގެ ކުށްދައްކަން އިދިކޮޅުން މަސައްކަތް ކުރާނެ ކަމަށް ރައީސް ވިދާޅުވިއެވެ.
”ދެން ބުނެފާނެ ޕީއެންސީގެ މެޖޯރިޓީއޭ އޮތީ، ތެދެއްމެ ކައުންސިލުގައި އޮތީ 18 ކައުންސިލަރުންގެ ތެރެއިން 15 ކައުންސިލަރުންނަކީ އަޅުގަނޑުމެންގެ ޕާޓީ ކައުންސިލަރުން، އެގޮތަށް މެޖޯރިޓީ އެބައޮތް، އެހެންނަމަވެސް ކައުންސިލް ހިނގާ އުޞޫލު އަދި ކައުންސިލް ހިނގާ ޤަވާއިދު އަޅުގަނޑަށް ވަރަށް ރަނގަޅަށް އަދި މިކަން ވަރަށް ރަނގަޅަށް އެނގޭ ހުރިހާ ބޭފުޅުންނަށް ވަރަށް ރަނގަޅަށް އެނގިލައްވާނެ،“ – ރައީސް މުޢިއްޒު ވިދާޅުވިއެވެ.
