މިއަހަރުގެ ރަމަޟާން މަހުގެ ފަހުދިހައެއް ހިމެނޭ ދުވަސްތަކަކީ ސަރުކާރު ބަންދު ދުވަސްތަކެއް ކަމުގައި ރައީސުލްޖުމްހޫރިއްޔާގެ އޮފީހުން ހަމަޖައްސައިފިއެވެ.
މިކަމާ ގުޅިގެން ރައީސް އޮފީހުން މިއަދު ބުނީެފައިވަނީ އަންނަ މާރިޗު މަހުގެ ނުވަވަނަ ދުވަހުން ފެށިގެން ރަމަޟާން މަހުގެ ފަހުދިހައެއް ނިމުމާ ހަމައަށް ސަރުކާރުގެ އޮފީސްތައް ބަންދުވާނެ ކަމަށެވެ. އެއީ، 1445ވަނަ އަހަރުގެ ރަމަޟާން މަހުން ފެށިގެން، ކޮންމެ އަހަރެއްގެ ރަމަޟާން މަހުގެ 20 ވަނަ ދުވަހުން ފެށިގެން އެ މަހުގެ ނިޔަލަށް ހިނގާ ދުވަސްތަކަކީ، ސަރުކާރު ބަންދު ދުވަސްތަކެއް ކަމަށް ރައީސް އޮފީހުން 4 ފެބުރުވަރީ 2024 ވަނަ ދުވަހު ނެރުއްވި ދެންނެވުމުން އެކަން ހަމަޖައްސަވާފައިވާތީ ކަމަށް ރައީސް އޮފީހުން ވަނީ ބުނެފައެވެ.
ރަމަޟާން މަހުގެ ފަހު 10 ހިމެނޭ ދުވަސްތަކަކީ ބަންދު ދުވަސްތަކެއް ގޮތުގައި ހަމަޖެއްސީ، އިސްލާމީ އުޞޫލުތައް ޤާއިމުކުރުމަށާއި، ދީނީ ކަންކަމަށް ރައްޔިތުން ލޯބި ޖެއްސުމާއި، ދީނީ ކަންކަމަށް އިސްކަން ދިނުމަށް ފުރުޞުތު ދިނުމުގެ ގޮތުންނެވެ.
ރަމަޟާން މަހުގެ ފަހުދިހައަކާ ގުޅިގެން ސަރުކާރު ބަންދުވާ ދުވަސްތަކުގައި، ސަރުކާރުގެ އެކިއެކި މުއައްސަސާތަކުން ރައްޔިތުންނަށް ކޮންމެހެން ފޯރުކޮށްދޭންޖެހޭ ޚިދުމަތްތައް، އެ މުއައްސަސާތަކުން ކަނޑައަޅާ ގޮތެއްގެ މަތިން ފޯރުކޮށްދޭނެކަމުގެ ޔަޤީންކަން ރައީސް އޮފީހުން ވަނީ އިތުރަށް ދީފައެވެ.
