ރާއްޖެއަށް މިހާރު ދިމާވެފައިވާ ވައި ނުސާފުވުމުގެ މައްސަލަ ޙައްލުކުރުމަށް މަސައްކަތްތަކެއް ކުރަމުން އަންނަ ކަމަށާއި، މި މައްސަލައަކީ ސަރުކާރުން ވަރަށް ބޮޑު އިސްކަމެއްދީގެން ބަލާނެ މައްސަލައެއް ކަމަށް މިނިސްޓްރީ އޮފް ފޮރިން އެފެއަރޒް އިން ބުނެފިއެވެ.
މިކަމާ ގުޅިގެން ފޮރިން މިނިސްޓްރީން ބުނެފައިވަނީ، ރާއްޖޭގެ ވައި ނުސާފުވުމުގެ ސަބަބުން ކުރިމަތިވާ ނޭދެވޭ އަސަރުތަކަށް ދިވެހި ސަރުކާރުން ޚާއްޞަ އިސްކަމެއް ދެމުން އަންނަ ކަމަށެވެ. އެގޮތުން މި ދުވަސްވަރު ރާއްޖެއަށް ކުރިމަތިވެފައިވާ ދުންފުހުގެ ޙާލަތަކީ މުޅި ދެކުނު އޭޝިއާ ސަރަޙައްދަށް ކުރިމަތިވެފައިވާ މައްސަލައެއްކަން ފާހަގަކުރަމުން ފޮރިން މިނިސްޓްރީން ބުނެފައިވަނީ ވައި ނުސާފުވުމުގެ ސަބަބުން ޢާންމުންގެ ދިރިއުޅުމަށާއި އިޤްތިޞާދާއި ޞިއްޙީގޮތުން ނޭދެވޭ އަސަރުތަކެއްކުރުން އެކަށީގެންވާ ކަމަށެވެ.
ކަން މިހެން އޮތުމާއެކު، ރާއްޖޭގެ ވައިގެ ފެންވަރު ރަނގަޅުކުރުމަށާއި، މި މައްސަލައަށް ދާއިމީ ޙައްލެއް ހޯދުމަށްޓަކައި ބޭރު ޤައުމުތަކާއި ސަރަޙައްދީ އަދި ބައިނަލްއަޤުވާމީ ފެންވަރުގައި ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށް ފޮރިން މިނިސްޓްރީން ވަނީ ބުނެފައެވެ. އޭގެތެރޭގައި، ސައިންޓިފިކް ދިރާސާތައް ކުރުމާއި މަޢުލޫމާތު ބަދަލުކުރުން އަދި ސަރަޙައްދީ ޤައުމުތަކާއެކު މަޝްވަރާކޮށްގެން ދާއިމީ ޙައްލެއް ހޯދުމުގެ މަސައްކަތް ހިމެނޭ ކަމަށް ފޮރިން މިނިސްޓްރީން ބުންޏެވެ.
ރާއްޖެއަކީ ކުޑަ ޖަޒީރާ ޤައުމަކަށް ވުމާއެކު، ތިމާވެށި ޙިމާޔަތްކުރުމަށާއި ދެމެހެއްޓެނިވި ތަރައްޤީއަށް ސަރުކާރުން އަބަދުވެސް އެންމެ މަތީ އިސްކަމެއް ދޭނެކަމުގެ ޔަޤީންކަން ފޮރިން މިނިސްޓްރީން ވަނީ ދީފައެވެ.
ފާހަގަކޮށްލެވޭ ގޮތުގައި، އެހެން އަހަރުތަކާއި ޚިލާފަށް، މި އަހަރު ރާއްޖޭގެ ވައި ނުސާފުވާ މިންވަރު ވަނީ އިތުރުވެފައެވެ. އެގޮތުން ދުވަހަކު ކަހަލަ ގޮތަކަށް މެޓް އޮފީހުން އަންނަނީ ރެޑް އެލާޓްވެސް ނެރެމުންނެވެ.
