ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމާ ގުޅޭގޮތުން ރައްޔިތުންގެ ޚިޔާލު ހޯދުމަށް ނެގުމަށް ނިންމާފައިވާ ފެންނަ ނުފެންނަ ވޯޓު ނެގުމާ ދެކޮޅަށް އިހުތިޖާޖު ކުރުމުގެ ނަމުގައި މާލޭގެ މަގުތަކަށް ނުކުމެ، މަގުމަތި ހަލަބޮލިކުރަން އެމްޑީޕީން ތައްޔާރުވެއްޖެއެވެ.
އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި މިކަން ހާމަކުރެއްވީ ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޛާކިރެވެ. އޭނާ ވިދާޅުވި ގޮތުގައި، ”ހުދުމުޚުތާރު“ ވެރިކަމަކަށް ރާއްޖެ އަނބުރާލުމަށް ކުރާ މަސައްކަތާ ދެކޮޅަށް ދިވެހި ރައްޔިތުން ތެދުވާން ޖެހޭ ކަމަށާއި، އެކަމުގައި އެމްޑީޕީން ކުރަމުން އަންނަ މަސައްކަތުގައި ރައްޔިތުން ބައިވެރިވެ، ދެ އިންތިޚާބު އެއްކޮށްލުމަށް ނޫނެކޭ ބުނަން ޖެހޭ ކަމަށެވެ.
އެމްޑިޕީން އަންނަނީ މައި ދެ އިންތިޚާބު އެއްކޮށްލުމަށްޓަކައި ރައްޔިތުންގެ ޚިޔާލެއް ހޯދުމަށް ނެގުމަށް ނިންމާފައިވާ ފެންނަ ނުފެންނަ ވޯޓު ހުއްޓުވުމަށް ގިނަ މަސައްކަތެއް ކުރަމުންނެވެ.
އެގޮތުން މުޅި ރާއްޖެއަށް އަމާޒުކޮށްގެން ކެމްޕެއިން ހަރަކާތްތަކެއް ކުރިއަށްގެންދާނެ ކަމަށާއި، އަންނަ މާރިޗު މަހުގެ 21 ވަނަ ދުވަހު މާލޭގައި ބޮޑު އެއްވުމެއްވެސް ކުރިއަށްގެންދިއުމަށް ނިންމާފައިވާ ކަމަށް މަޢުރޫފް ވަނީ ވިދާޅުވެފައެވެ.
މަޢުރޫފްގެ އިތުރުން އެމްޑީޕީގެ މިއަދުގެ ނޫސްވެރިންގެ ބައްދަލުވުމުގައި ވާހަކަދެއްކެވި އެ ޕާޓީގެ ބައެއް އިސްފަރާތްތަކުން ވަނީ މައި ދެ އިންތިޚާބު އެއްކޮށްލުމުގެ ކުރިން ރައްޔިތުންގެ ޚިޔާލު ހޯދުމަށް ނަގަން ނިންމާފައިވާ ފެންނަ ނުފެންނަ ވޯޓާ ގުޅޭގޮތުން ވެސް ޙަޤީޤަތާ ޚިލާފު ވާހަކަތަކެއް ދައްކައިފައެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެ އިންތިޚާބު އެއްކޮށްލަން އުޅުއްވަނީ އަމިއްލަ ފައިދާއަށް ވެރިކަމުގެ ދައުރު 20 އަހަރަށް ދަންމާލުމަށްޓަކައި ކަމަށާއި އެއީ ސީދާ ރައްޔިތުންގެ އަތުން ރައްޔިތުންގެ ބާރު ކަނޑުވާލުމަށް އެމަނިކުފާނު ކުރައްވަން އުޅުއްވާ ކަމެއްގެ ގޮތުގައި ވަނީ ސިފަކޮށްފައެވެ.
މައި ދެ އިންތިޚާބު އެއްކޮށްލުމާ އެމްޑީޕީން ދެކޮޅަށް ވާހަކަދައްކަމުން އަންނައިރު ނިމިދިޔަ އެމްޑީޕީ ސަރުކާރުގައި އޭރު ރައީސް ކަމުގައި ހުންނެވި އިބްރާހިމް މުޙައްމަދު ޞާލިޙް، 14 ޖަނަވަރީ 2020 ވީ އަންގާރަ ދުވަހު ހދ. ނޮޅިވަރަމަށް ވަޑައިގެން، އެ ރަށުގައި ބޭއްވި ޖަލްސާއެއްގައި ވިދާޅުވެފައިވަނީ ރިޔާސީ އިންތިޚާބާއި، ރައްޔިތުންގެ މަޖިލީހުގެ އިންތިޚާބުގެ އިތުރުން ލޯކަލް ކައުންސިލްތަކުގެ އިންތިޚާބު އެކުގައި ބޭއްވުމަކީ އެންމެ ރަނގަޅު ގޮތް ކަމަށްވާތީ ތިން އިންތިޚާބު އެކުގައި ބޭއްވުމަށް ފެނިވަޑައިގަންނަވާ ކަމަށެވެ.
ފާހަގަކޮށްލެވޭ ގޮތުގައި އިހުތިޖާޖުކުރުމުގެ ނަމުގައި އެމްޑީޕީ އަކީ އަބަދުވެސް މަގު މައްޗަށް ނުކުމެ މަގުމަތި ހަލަބޮލިކުރުމަށް މަސައްކަތް ކުރާ ހިތްވާ ޕާޓީއެކެވެ. އެގޮތުން މިދިޔަ އަހަރުގެ އޮކްޓޫބަރު މަހުގެ ތިންވަނަ ދުވަހު އެ ޕާޓީން ވަނީ މަގުމައްޗަށް ނުކުމެ ފުލުހުންނާ ކުރިމަތިލައި ހަމަނުޖެހުން ހިންގައިފައެވެ. އަދި އެމްޑީޕީ ވެރިކަން ނިމުނުފަހުން ކޮންމެ ރަމަޟާން މަހެއްގެ ފަހު 10 ގައި މަގުތަކަށް ނުކުމެ ދީނީ އަޅުކަންތަކަށް ދަނީ ހުރަސް އަޅަމުންނެވެ.
