އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިންނަށް ސުވާލުކުރަން ފުރުޞަތު ނުދީ ޕްރެސް ކޮންފަރެންސް ނިންމާލައިފިއެވެ.
އެމްޑީޕީގެ މިއަދުގެ ނޫސްވެރިންގެ ބައްދަލުވުން މަޢުޟޫއު ޚާއްޞަކޮށްފައިވަނީ ކުރިއަށް އޮތް ލޯކަލް ކައުންސިލްތަކުގެ އިންތިޚާބާ ދިމާކޮށް ރައްޔިތުންގެ ޚިޔާލު ހޯދުމުގެ ގޮތުން ނެގުމަށް ނިންމާފައިވާ ފެންނަ ނުފެންނަ ވޯޓާ ގުޅޭގޮތުންނެވެ. ސަރުކާރުން ވަނީ ކުރިއަށް އޮތް ލޯކަލް ކައުންސިލްތަކުގެ އިންތިޚާބާ އެކުގައި ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލުމާ ގުޅޭގޮތުން ރައްޔިތުންގެ ޚިޔާލެއް އެކަމުގައި ހޯދުމަށް ފެންނަ ނުފެންނަ ވޯޓެއް ނެގުމަށް ނިންމައި ރައްޔިތުން އެދޭ ގޮތަށް ވޯޓުގެ ކަންކަން ކުރިއަށްގެންދިއުމަށް ނިންމައިފައެވެ.
ނޫސްވެރިންގެ ބައްދަލުވުން ފަށަމުން ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެންބަރު އަޙްމަދު ސަލީމް (ސައްލެ) ނޫސްވެރިންނަށް ސުވާލުކުރަން ފުރުޞަތު ހުޅުވާލާނެކަމަށް ވިދާޅުވި ނަމަވެސް، ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މަޢުރޫފް ޛާކިރު ވަނީ ނަމާދު ވަގުތު ޖެހެނީ ކަމަށް ވިދާޅުވެ ނޫސްވެރިންނަށް ސުވާލުކުރަން ފުރުޞަތު ނުދީ ބައްދަލުވުން ނިންމާލައިފައެވެ. ނަމާދު ވަގުތު ޖެހެނީ ކަމަށް ބުނެ ބައްދަލުވުން ނިންމާލި ނަމަވެސް، ބައްދަލުވުން ނިންމާލި ވަގުތާ ޢަޞްރު ނަމާދު ބަންގި ގޮވުމާ ދޭތެރޭގައި އޭރު 20 މިނެޓް އޮތެވެ.
މިކަމާ ގުޅިގެން ވަރަށް ގިނަ ބައެއްގެ ފާޑުކިޔުން އެމްޑީޕީއަށް ވަނީ އަމާޒުވެފައެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޫސްވެރިންނާ ބައްދަލުނުކުރައްވާ ކަމަށް ބުނެ ފާޑުކިޔާ މީހުންގެ ޙާލަކީ މިއީތޯ އެއް ބަޔަކު ސުވާލު އުފައްދާފައިވާއިރު، އަނެއް ބަޔަކު ވަނީ ލާދީނިއްޔަތު ފަތުރަން މަސައްކަތް ކުރާ ބަޔަކު ނަމާދަށް އިސްކަން ދޭނެތޯ ވެސް ސުވާލު އުފައްދައިފައެވެ.
އެމްޑީޕީގެ މިއަދުގެ ނޫސްވެރިންގެ ބައްދަލުވުމުގައި ވާހަކަދެއްކެވި އެ ޕާޓީގެ ބައެއް އިސްފަރާތްތަކުން ވަނީ މައި ދެ އިންތިޚާބު އެއްކޮށްލުމުގެ ކުރިން ރައްޔިތުންގެ ޚިޔާލު ހޯދުމަށް ނަގަން ނިންމާފައިވާ ފެންނަ ނުފެންނަ ވޯޓާ ގުޅޭގޮތުން ވެސް ޙަޤީޤަތާ ޚިލާފު ވާހަކަތަކެއް ދައްކައިފައެވެ. އެގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެ އިންތިޚާބު އެއްކޮށްލަން އުޅުއްވަނީ އަމިއްލަ ފައިދާއަށް ވެރިކަމުގެ ދައުރު 20 އަހަރަށް ދަންމާލުމަށް ކަމަށާއި، އެއީ ސީދާ ރައްޔިތުންގެ އަތުން ރައްޔިތުންގެ ބާރު ކަނޑުވާލުމަށް އެމަނިކުފާނު ކުރައްވަން އުޅުއްވާ ކަމެއްގެ ގޮތުގައި ވަނީ ސިފަކޮށްފައެވެ.
މައި ދެ އިންތިޚާބު އެއްކޮށްލުމާ އެމްޑީޕީން ދެކޮޅަށް ވާހަކަދައްކަމުން އަންނައިރު ނިމިދިޔަ އެމްޑީޕީ ސަރުކާރުގައި އޭރު ރައީސް ކަމުގައި ހުންނެވި އިބްރާހިމް މުޙައްމަދު ޞާލިޙް، 14 ޖަނަވަރީ 2020 ވީ އަންގާރަ ދުވަހު ހދ. ނޮޅިވަރަމަށް ވަޑައިގެން، އެ ރަށުގައި ބޭއްވި ޖަލްސާއެއްގައި ވިދާޅުވެފައިވަނީ ރިޔާސީ އިންތިޚާބާއި، ރައްޔިތުންގެ މަޖިލީހުގެ އިންތިޚާބުގެ އިތުރުން ލޯކަލް ކައުންސިލްތަކުގެ އިންތިޚާބު އެކުގައި ބޭއްވުމަކީ އެންމެ ރަނގަޅު ގޮތް ކަމަށްވާތީ ތިން އިންތިޚާބު އެކުގައި ބޭއްވުމަށް ފެނިވަޑައިގަންނަވާ ކަމަށެވެ. މީގެ އިތުރުން ކުރީގެ ރައީސް މުޙައްމަދު ނަޝީދު ވެސް ވަނީ މައި ދެ އިންތިޚާބު އެއްކޮށްލުމަށް ސަރުކާރުން ނިންމާފައިވާ ނިންމުމަކީ އެންމެ ރަނގަޅުގޮތް ކަމަށް ދެކެވަޑައިގަންނަވާ ކަމަށް ވިދާޅުވެފައެވެ.
ރައްޔިތުން ކޮންމެ ގޮތަކަށް ގޮތް ނިންމި ކަމުގައިވީ ނަމަވެސް އަދުގެ ސަރުކާރުން ރައްޔިތުންގެ ނިންމުމަށް އިޙުތިރާމް ކުރާނެ ކަން މީގެ ކުރިން ވެސް ވަނީ ހާމަކޮށްދީފައެވެ. އެގޮތުން އައްޑޫ ސިޓީ ކައުންސިލުން އެ އަތޮޅު ފޭދޫ، މީދޫ އަދި ހުޅުދޫ ވަކިކުރުމަށް ބޭއްވި ފެންނަ ނުފެންނަ ވޯޓުގައި ވެސް ފޭދޫ ރައްޔިތުންގެ ނިންމުމަށް އިޙުތިރާމްކޮށް އައްޑޫ ސިޓީ ކައުންސިލުން ފޭދޫ ވަކި ނުކުރަން ސަރުކާރުން ވަނީ ނިންމައިފައެވެ.
