ހުޅުުމާލޭ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްޤީކޮށްފައިވާ އަމާން އުދަރެސްގެ ފުލެޓެއްގައި ބިދޭސީންގެ ލޭބަރ ކުއާޓަރ ހެދި މައްސަލައާ ގުޅިގެން ފިޔަވަޅު އަޅާނެ ކަމުގެ އިންޒާރު އެފްޑީސީން ދިނުމުން ތަން ހުސްކުރުމަށް ފަހު އެ ތަނުގައި ފުލެޓް ލިބުނު ޢާއިލާ ދިރިއުޅެން ފަށައިފިއެވެ.
އަމާން އުދަރެސްގެ ފުލެޓެއްގައި ބިދޭސީންގެ ލޭބަރ ކުއާޓަރ ހެދި މައްސަލައާ ގުޅިގެން މި ހިނގާ ފެބްރުއަރީ މަހުގެ 11 ވަނަ ދުވަހު އެ ފުލެޓުގެ ވެރިފަރާތް ވަނީ ޖޫރިމަނާ ވެސް ކޮށްފައެވެ. އަދި 10 ދުވަހުގެ ތެރޭގައި ވެރިފަރާތުން އެތަން ހުސްނުކޮށްފި ނަމަ، އެއްބަސްވުން ބާޠިލުކޮށް، އެހެން ބަޔަކަށް އެ ފުލެޓް ދޭނެ ކަމުގެ އިންޒާރު އެފްޑީސީން ވަނީ ދީފައެވެ.
މި މައްސަލާގައި ފުލެޓް ލިބުނު ފަރާތް ވަނީ ބައި ލައްކަ ރުފިޔާއިން ޖޫރިމަނާކޮށްފައެވެ.
ފްލެޓު ލިބުނު ފަރާތްތަކާއި އެފްޑީސީއާއެކު ވެފައިވާ އެއްބަސްވުމުގައިވާ ގޮތުން، ފްލެޓްތައް ކުއްޔަށް ދޫކުރުމަކީ މަނާ ކަމެކެވެ. ފުލެޓް ކުއްޔަށް ދޫކޮށްފިކަން ފާހަގަކުރެވިއްޖެ ޙާލަތެއްގައި އެއްބަސްވުން ބާޠިލުކޮށް އެހެން ބަޔަކަށް ތަން ދިނުމުގެ ޙައްޤު އެފްޑީސީއަށް ލިބިގެންވާ ކަމުގައި އެއްބަސްވުގައި ބަޔާންކޮށްފައިވެއެވެ.
ބޮޑެތި އަދަދުތަކުން ލޯނު ނަގައިގެން ޢިމާރާތްކޮށްފައި ހުންނަ މިފަދަ ސޯޝަލް ހައުސިންގ ޔުނިޓުތަކުގައި، އެއްބަސްވުމާ ޚިލާފަށް ގިނަ ބަޔަކު އަންނަނީ އުޅެމުންނެވެ. އެގޮތުން އެއް ބަޔަކު އެޕާޓްމަންޓްތައް ބޮޑު އަގުގައި ކުއްޔަށް ދޫކުރަމުންދާއިރު އަނެއް ބަޔަކު ޤަވާއިދުން ދައްކަންޖެހޭ ކުލި ވެސް ނުދައްކައި އުޅެމުން އަންނަކަން ފާހަގަކޮށްލެވެއެވެ.
