ސަޢޫދީ ޢަރަބިއްޔާގެ ސަރުކާރުން ރާއްޖެއަށް 15 ޓަނުގެ ކަދުރު ހަދިޔާކޮށްފިއެވެ.
މިކަމަށްޓަކައި މިއަދު އިސްލާމީ މަރުކަޒުގައި ބޭއްވި ޚާއްޞަ ރަސްމިއްޔާތެއްގައި ސަޢޫދީ ޢަރަބިއްޔާގެ ފަރާތުން ރާއްޖެއަށް ކަދުރު ހަދިޔާކޮށްދެއްވީ އެ ޤައުމުން ރާއްޖެއަށް ކަނޑައަޅާފައިވާ ސަފީރު ޔަޙްޔާ ޙަސަން އަލްގަހްތާނީއެވެ. ރާއްޖޭގެ ފަރާތުން ސަޢޫދީން ދެއްވި ހަދިޔާއާއި ޙަވާލުވެވަޑައިގަތީ އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދެވެ.
ސަޢޫދީ ސަރުކާރުން ރާއްޖެއަށް މި ވަގުތު 15 ޓަނުގެ ކަދުރު ހަދިޔާ ކުރެއްވި ނަމަވެސް، އެ ޤައުމުގެ ސަރުކާރުންވަނީ ޖުމްލަ 50 ޓަނުގެ ކަދުރު ރާއްޖެއަށް ހަދިޔާކުރެއްވުމަށް ވަނީ ނިންމަވައިފައެވެ. އިސްލާމިކް މިނިސްޓްރީން ބުނީ، ބާކީ ހުރި ކަދުރު ޝިޕްމަންޓް މިހާރު ވަނީ ރާއްޖެ އައުމުގެ މަގުމަތީގައި ކަމަށާއި، އެ ޝިޕްމަންޓް ލިބުމާއެކު ރާއްޖޭގެ ހުރިހާ ސަރަޙައްދުތަކަކަށް ކަދުރު ބެހުމުގެ މަސައްކަތް ފެށިގެންދާނެ ކަމަށެވެ.
މި ރަސްމިއްޔާތުގައި ވާހަކަފުޅު ދައްކަވަމުން އިސްލާމިކް މިނިސްޓަރު ޑރ. ޝަހީމް ވިދާޅުވީ، ސަޢޫދީ ޢަރަބިއްޔާއަކީ ރާއްޖެއަށް އަބަދުވެސް އެހީތެރިވެދޭ ޤައުމެއްކަން ފާހަގަކުރައްވައި، އެ ޤައުމުން ރާއްޖެއަށް ވަމުންދާ އެހީތެރިކަމަށް ޝުކުރު އަދާކުރައްވައިފައެވެ. މީގެ އިތުރުން ކޮންމެ އަހަރެއްގެ ރަމަޟާން މަހަކުވެސް ސަޢޫދީން ރާއްޖެއަށް ކަދުރު ހަދިޔާކުރުމަކީ ދެ ޤައުމުގެ ދެމެދު އުފެދިފައިވާ ގާތް ގުޅުން ހާމަވެގެންދާ ކަމެއް ކަމަށްވެސް މިނިސްޓަރު ވަނީ ވިދާޅުވެފައެވެ.
ފާހަގަކޮށްލެވޭ ގޮތުގައި ކޮންމެ އަހަރެއްގެވެސް ރަމަޟާން މަހާ ދިމާކޮށް ސަޢޫދީ ސަރުކާރުން އަންނަނީ ރާއްޖެއަށް ކަދުރު ހަދިޔާ ކުރަމުންނެވެ. އެގޮތުން ނިމިދިޔަ 2025 ވަނަ އަހަރުވެސް 60 ޓަނުގެ ކަދުރު އެ ޤައުމުގެ ސަރުކާރުން ރާއްޖެއަށް ހަދިޔާކޮށްފައިވެއެވެ.
