އިލެކްޝަންސް ކޮމިޝަނުން މިހާރު އުވާލާފައިވާ ދިވެހި ރައްޔިތުންގެ ޕާޓީ (ޑީއާރުޕީ) އިން ދައްކަންޖެހޭ ދަރަނި ދައްކަން އެ ޕާޓީގެ ކުރީގެ ލީޑަރު މުޙައްމަދު ނަޝީދު (ކާނަލް ނަޝީދު) ގެ މައްޗަށް ސިވިލް ކޯޓުން ޙުކުމްކޮށްފިއެވެ.
ސިވިލް ކޯޓުގެ ޙުކުމުގައިވާ ގޮތުން، ޑީއާރުޕީން ދައްކަންޖެހޭ މި ދަރަންޏަކީ ރައްޔިތުންގެ މަޖިލީހުގެ ކުޑަހުވަދޫ ދާއިރާގެ ކުރީގެ މެންބަރު އަޙްމަދު އާމިރަށް އެ ޕާޓީން ދައްކަންޖެހޭ ދަރަންޏެކެވެ. މި މައްސަލައަކީ އާމިރު ހިންގި ޕްރޮޑަކްޝަންގެ ދެ ކުންފުންޏަކުން 2007 ވަނަ އަހަރުން ފެށިގެން 2009 ވަނަ އަހަރާއި ހަމައަށް ޑީއާރުޕީގެ ބައެއް ހަރަކާތްތައް ވީޑިއޯކުރުމާއި އެޑިޓްކުރުމާއި އެކި ކަހަލަ ސާމާނު ފޯރުކޮށްދީގެން ދީފައިވާ ޚިދުމަތްތަކަށް ދައްކަންޖެހޭ 4.04 މިލިއަން ރުފިޔާ އެ ޕާޓީން ނުދައްކައި އޮތް މައްސަލައެކެވެ.
އެ ޕާޓީން ދައްކަން ޖެހޭ ފައިސާ ނުދެއްކުމުން ޖޫރިމަނާ ގޮތުގައި އިތުރަށް 16.3 މިލިއަން ރުފިޔާ ދައްކަން އޮތް ނަމަވެސް، ހައިކޯޓުން މީގެ ކުރިން ނިންމީ ޖޫރިމަނާ އެއްކޮށް އުނިކުރުމަށް ފަހު، ޚިދުމަތުގެ އަގަށް އެކަނި ނެގުމަށެވެ. އެ ޙުކުމަށް ސުޕްރީމް ކޯޓުން އޭރު ތާޢީދުކޮށްފައިވީ ނަމަވެސް މައްސަލަ ޝަރުޢީ މަރުޙަލާގައި އޮއްވައި ސިޔާސީ ޕާޓީއެއްގައި ހުންނަންޖެހޭ ޝަރުތުތައް ފުރިހަމަ ނުވާތީ އިލެކްޝަންސް ކޮމިޝަނުން ޑީއާރުޕީ އުވާލީއެވެ.
ޑީއާރުޕީ އުވާލި އިރު ބޮޑެތި އަދަދުތަކުން ދަރަނި ދައްކަން އޮތްއިރު އިލެކްޝަން ކޮމިޝަނުން ކަނޑައަޅާފައިވަނީ އެ ދަރަންޏަށް ޒިންމާވާން ޖެހޭނީ ޕާޓީ އުވާލިި އިރު ޕާޓީގެ އެންމެ އިސް ފަރާތެއްގެ ގޮތުގައި ހުރި ފަރާތް ކަމަށެވެ. އެގޮތުން ޑީއާރުޕީ އުވާލި އިރު ޕާޓީގެ އެންމެ އިސް ފަރާތެއްގެ ގޮތުގައި ހުރީ ކާނަލް ނަޝީދެވެ.
ފާހަގަކޮށްލެވޭ ގޮތުގައި ސިވިލް ކޯޓުން މި މައްސަލަ ނިންމީ ކާނަލް ނަޝީދުގެ ޢައިރު ހާޒިރުގައެވެ. އެގޮތުން ސިވިލް ކޯޓުން ވަނީ ކުރިއަށް އޮތް 14 ދުވަހުގެ ތެރޭގައި ރައްޔިތުންގެ މަޖިލީހުގެ ކުޑަހުވަދޫ ދާއިރާގެ ކުރީގެ މެންބަރު އަޙްމަދު އާމިރުގެ ދެ ކުންފުންޏަށް ޑީއާރުޕީންް ދައްކަންޖެހޭ 4.04 މިލިއަން ރުފިޔާ އެއްކޮށް ދައްކައި ޚަލާޞްކުރުމަށް ޙުކުމްކޮށްފައެވެ.
