ވިލިމާލޭގައި ބަގީގެ ޚިދުމަތް އަލުން ފަށަން ނިންމާފައިވާ ކަމަށް މާލޭ ސިޓީ ކައުންސިލުން ހާމަކޮށްފިއެވެ.
މިކަމާ ގުޅިގެން މާލޭ ސިޓީ ކައުންސިލުން ކޮށްފައިވާ އިޢުލާނެއްގައި ބުނެފައިވަނީ، ވިލިމާލޭގައި އަލުން ރަނގަޅު ފެންވަރެއްގައި ބަގީގެ ޚިދުމަތް ތަޢާރަފް ކުރުމަށްޓަކައި، ތިމާވެއްޓާއި ރައްޓެހި އިލެކްޓްރިކް ބަގީ ސަޕްލައިކޮށްދޭނެ ފަރާތެއް ހޯދުމަށް ބޭނުންވާތީ، މި މަސައްކަތް ކުރުމަށް ބީލަން ހުށަހެޅުމުގެ ފުރުޞަތު ހުޅުވާލާ ކަމަށެވެ.
މާލޭ ސިޓީ ކައުންސިލުން ވަނީ މި މަސައްކަތުގެ ތަފްޞީލު ވެސް ޢާންމުކޮށްފައެވެ. އެގޮތުން ޚިދުމަތް ދިނުމަށް ގެންނަ ބަގީތަކުގައި ހުންނަންޖެހޭ ޝަރުތުތަކަށް ބަލައިލާއިރު:
- 11 ސީޓުގެ 4 ބަގީ
- 8 ސީޓުގެ 3 ބަގީ
- 2 ކާގޯ ބަގީ
- ބޭނުންވަނީ LVTONG ބްރޭންޑުގެ ބަގީ
- ވެހިކަލް ގެންނައިރު ސިޓީ ކައުންސިލްގެ ލޯގޯ ހުންނަންވާނެ
މާލޭ ސިޓީ ކައުންސިލުން ބުނީ ބަގީ ސަޕްލައިކޮށްދޭ ފަރާތުން މަދުވެގެން އަހަރު ދުވަސް ވަންދެން ސްޕެއަރ ޕާޓްސް ލިބޭނެ އިންތިޒާމު ހަމަޖައްސައިދޭން ޖެހޭނެ ކަމަށެވެ.
މާލޭ ސިޓީ ކައުންސިލުން ބުނީ ބިޑު ހުށަހަޅަން ޝައުގުވެރިވާ ފަރާތްތަކުން މި މަހުގެ 26 ވަނަ ދުވަހު މަޢުލޫމާތު ސާފުކުރުމަށް މާލެ ސިޓީ ކައުންސިލުގެ ހޯލަށް ދިއުމަށެވެ. އަދި އަގު ހުށަހެޅުމުގެ ފުރުޞަތު އަންނަ މާރިޗު މަހުގެ ފަސްވަނަ ދުވަހުގެ 11:30 ގެ ކުރިން އޮންނާނެ ކަމަށް ސިޓީ ކައުންސިލުން ބުންޏެވެ. މީގެ އިތުރުން ބީލަން ހުށަހެޅުމުގެ ފުރުޞަތު ދިވެހި ކުންފުނިތަކަށާއި ޕާޓްނަރޝިޕް އަދި ލޯކަލް އިންވެސްޓްމެންޓުތަކުގެ އިތުރުން ވިޔަފާރިކުރުމުގެ ހުއްދަ ލިބިފައިވާ ފަރާތްތަކަށް އޮންނާނެ ކަމަށްވެސް މާލޭ ސިޓީ ކައުންސިލުން ވަނީ ބުނެފައެވެ.
މީގެ ކުރިން 2023 ވަނަ އަހަރުގެ އޭޕްރީލް މަހުގެ ތެރޭގައި ވެސް މާލޭ ސިޓީ ކައުންސިލުން ވިލިމާލޭގައި ބަގީގެ ޚިދުމަތް ފެށި އެވެ. އޭރު އެ ޚިދުމަތް ފެށީ މިހާރުގެ ރައީސް ޑރ. މުޙައްމަދު މުޢިއްޒު މާލޭ ސިޓީ މޭޔަރު ކަމުގައި ހުންނަވައިގެންނެވެ. އެހެންނަމަވެސް ފަހުން ވަޑައިންނެވި މޭޔަރާއިއެކު، މެއިންޓެނެންސް ނުކުރެވި ބަގީގެ ޚިދުމަތް މެދުކެނޑިފައިވާކަން ފާހަގަކޮށްލެވެއެވެ.
