ރާއްޖޭގެ މަޝްޙޫރު ދީނީ ޢިލްމުވެރިޔާ ޝެއިޚް ފަރީދުގެ ހަނދާނުގައި ބަންގްލަދޭޝްގައި ބިނާކުރި މިސްކިތް ހުޅުވައިފިއެވެ.
ބަންގްލަދޭޝްގައި ބިނާކުރި މި މިސްކިތަކީ ޚިދުމަތް ޖަމުޢިއްޔާ އިން އިސްނަގައިގެން ޝެއިޚް ފަރީދުގެ ހަނދާނުގައި ބިނާކުރި މިސްކިތެކެވެ. 350 މީހުންނަށްވުރެ ގިނަ މީހުންނަށް އެއްފަހަރާ ނަމާދުކުރެވޭ މި މިސްކިތް ހުޅުވުމަށް ޚާއްޞަ ރަސްމިއްޔާތެއްވެސް ބާއްވާފައިވެއެވެ. މި ރަސްމިއްޔާތުގައި މިސްކިތް ހުޅުވައިދެއްވީ ޝެއިޚް ފަރީދުގެ ދެ ދަރިކަލުން ކަމަށްވާ ޢަބްދުﷲ ފަރީދާއި ޢަބްދުއްރަޙްމާން ފަރީދެވެ.
މިދިޔަ 2025 ވަނަ އަހަރު ޖޫން މަހު ޝެއިޚް ފަރީދު ކުއްލި ގޮތަކަށް އަވަހާރަވުމާ ގުޅިގެން, ޝެއިޚް ފަރީދުގެ ހަނދާނުގައި ބަންގްލަދޭޝްގައި މިސްކިތެއް އެޅުމަށް އެހީތެރިކަން ފޯރުކޮށްދިނުމަށް ޚިދުމަތް ޖަމުޢިއްޔާއިން ފުރުޞަތު ހުޅުވާލުމުން 24 ގަޑިއިރު ނުވަނީސް އެކަމަށް ބޭނުންވާ ފައިސާ ލިބުނެވެ.
މީގެ އިތުރުން، ޚިދުމަތް ޖަމުޢިއްޔާއިން މިހާރު ވަނީ ރާއްޖޭގައިވެސް ޝެއިޚް ފަރީދުގެ ހަނދާނުގައި މިސްކިތެއް ބިނާކުރުމަށް ނިންމައިފައެވެ. މި މިސްކިތް ބިނާކުރުމަށް ހަމަޖެހިފައިވަނީ ހުޅުމާލޭ ތިންވަނަ ފިޔަވަހީގައެވެ. ޚިދުމަތް ޖަމުޢިއްޔާއިން މަޢުލޫމާތުދޭ ގޮތުގައި އެ މިސްކިތަކީ ޖުމްލަ 2،500 މީހުންގެ ޖާގައިގެ މިސްކިތެކެވެ.
