ރާއްޖޭގައި މަސައްކަތް ކުރާ ސްރީލަންކާގެ ރައްޔިތަކު އިސްލާމްވެއްޖެއެވެ.
މީސްމީޑިއާގެ އެކި މަންސަތަކުގައި މީހަކު ޙިއްޞާކޮށްފައިވާ ޕޯސްޓެއްގައިވާ ގޮތުން، އިސްލާމް ދީން ޤަބޫލުކޮށްފައި ވަނީ ސ.ފޭދޫ، ނަޔާ ސެލޫންގައި މަސައްކަތް ކުރަމުން އަންނަ ސްރީލަންކާގެ ރައްޔިތެއްކަމުގައިވާ ޖަޔަސިންގާ އަރްޗިގޭ ވަރޫނާ ޕްރަބާތު ސަދަރުވާންއެވެ. ”އެކި“ އަށް މަޢުލޫމާތު ލިބިފައިވާގޮތުގައި އެ މީހާ ޝަހާދަތްކިޔައި އިސްލާމްވުމުގެ ކަންކަން ކުރިއަށް ގެންގޮސްފައި ވަނީ އެރަށުގެ މިސްކިތެއްގެ ތެރޭގައެވެ.
އިސްލާމް ދީން ޤަބޫލުކުރުމަށް ފަހު އޭނާގެ ނަން މިހާރު ވަނީ، ޢަބްދުﷲ އާދަމްގެ ނަމަށް ބަދަލުކޮށްފައެވެ.
ރާއްޖެއަށް ޒިޔާރަތްކުރާ ފަތުރުވެރިންނާއި ރާއްޖޭގައި ދިރިއުޅޭ އެހެން ޤައުމުތަކުގެ އިސްލާމް ދީން ނޫން އެހެން ދީންތައް ޤަބޫލުކުރާ މީހުން އިސްލާމްދީން ޤަބޫލުކުރުމުގެ ކަންކަން މީގެ ކުރިންވެސް ހިނގާފައި އެބަހުއްޓެވެ. އެގޮތުން މި ފަހުން ޚަބަރުތަކުގެ ސުރުޚީތަކުން ފެނިގެންދިޔައީ ކ. ދިއްފުއްޓަށް ޗުއްޓީ ހޭދަކޮށްލުމަށް ޒިޔާރަތްކުރި އިނގިރޭސިވިލާތުގެ ފަތުރުވެރިއަކު އިސްލާމްވި ވާހަކައެވެ.
49 އަހަރުގެ އެ އަންހެން މީހާ އިސްލާމް ދީން ޤަބޫލުކުރުމަށް ފަހު މިހާރު ވަނީ އޭނާގެ ނަން ޚަދީޖާއަށް ބަދަލުކޮށްފައެވެ.
އިސްލާމިކް މިނިސްޓްރީގެ ތަފާސްހިސާބުތަކުން ދައްކާ ގޮތުގައި، 2024 ވަނަ އަހަރު އެކަނިވެސް ރާއްޖެއަށް ޒިޔާރަތްކުރި ފަތުރުންވެރިންގެ ތެރެއިން 39 އަކަށްވުރެ ގިނަ މީހުން އިސްލާމްވެފައިވެއެވެ. އޭގެ ތެރެއިން އެންމެ ގިނައީ ފިލިޕީންސްއަށް ނިސްބަތްވާ މީހުންނެވެ.
