މީހަކު ރަހީނުކޮށްގެން ގެންގުޅެ، އެ މީހާއަށް އަނިޔާކުރި މައްސަލައަކާ ގުޅިގެން ބަންގްލަދޭޝްއަށް ނިސްބަތްވާ މީހަކު ހައްޔަރުކޮށްފިއެވެ.
ކްރިމިނަލް ކޯޓުގެ ބަންދު އަމުރެއްގައިވާ ގޮތުން، މީހަކު ރަހީނުކުރުމުގެ މައްސަލައިގެ ތުހުމަތުގައި ހައްޔަރުކޮށްފައިވަނީ ބަންގްލަދޭޝްއަށް ނިސްބަތްވާ ޢުމުރުން 35 އަހަރުގެ، އިޤްބާލް މިއާ ނަމަކަށް ކިޔާ މީހެކެވެ. ކްރިމިނަލް ކޯޓުގެ ބަންދު އަމުރުގައިވާ ގޮތުން، އިޤްބާލް މިއާ ވަނީ ބިދޭސީ މީހަކު ރަހީނުކޮށްގެން ގެންގުޅެ، އެ މީހާއަށް އަނިޔާކޮށްފައެވެ. އަދި އޭނާ ކުށް ކުރިކަން ސާބިތުވާ ވަރަށް ހެކި ހުށަހަޅާފައިވާކަން އެ ކޯޓުގެ ބަންދު އަމުރުގައި ފާހަގަކޮށްފައިވެއެވެ.
އިޤްބާލް މިއާ ރާއްޖޭގައި ދިރިއުޅެނީ ޤަވާއިދާ ޚިލާފަށް ކަމަށާއި އޭނާގެ ފަރާތުން މުޖުތަމައަށް ނުރައްކަލެއް ކުރިމަވެދާނެ ކަމަށް ފެންނާތީ، އިއްޔެއިން ފެށިގެން 30 ދުވަހުގެ މުއްދަތަކަށް އިޤްބާލް މިއާ ބަންދު ކުރުމަށްވެސް ކްރިމިނަލް ކޯޓުގެ ބަންދު އަމުރުގައިވެއެވެ.
ރާއްޖޭގައި ބިދޭސީންގެ ބޮޑު އާބާދީއެއް އޮންނައިރު، އޭގެ ތެރެއިން ގިނަ މީހުންނަކީ ޤަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންނެވެ. ރަހީނުކުރުމާއި މާރާމާރީ ހިންގުމަކީ އެ މީހުންގެ މެދުގައި ޢާންމު ކަމަކަށްވެފައިވާއިރު ޤަވާއިދާ ޚިލާފަށް ރާއްޖޭގައި ދިރިއުޅޭ ބިދޭސީންގެ މައްސަލައަށް ޙައްލެއް ހޯއްދަވައިދެއްވުމަށް އަދުގެ ސަރުކާރުން ވެސް ގެންދަވަނީ މުހިއްމު މަސައްކަތްތަކެއް ކުރައްވަމުންނެވެ.
