ކުރިއަށް އޮތް ލޯކަލް ކައުންސިލް އިންތިޚާބު ކާމިޔާބު ކުރުމަށްޓަކައި ވެރިކަން ކުރާ ޕީއެންސީގެ ޓީމުތަކުން ވަރަށް އަވަހަށް ރަށްރަށަށް ދަތުރުތައް ފަށާނެ ކަމަށާއި، މިފަހަރުގެ އަމާޒަކީ ވަރަށް ބޮޑު ތަފާތަކުން އިންތިޚާބު ކާމިޔާބު ކުރުން ކަމަށް މިނިސްޓަރ އޮފް ސިޓީސް، ލޯކަލް ގަވަރްމަންޓް އެންޑް ޕަބްލިކް ވޯކްސް އާދަމް ޝަރީފް އުމަރު ވިދާޅުވެއްޖެއެވެ.
މިނިސްޓަރ ދެއްވި އިންޓަވިއުއެއްގައި ވިދާޅުވީ ރަމަޟާން މަހުގެ ތެރޭގައިވެސް ޕީއެންސީގެ ފަރާތުން ކެމްޕޭންގެ މަސައްކަތްތައް ވަރަށް އިންތިޒާމުވެގެން ކުރިއަށްދާނެ ކަމަށެވެ. އެގޮތުން ކުރިއަށް އޮތް ދުވަސްތަކުގެ ތެރޭގައި ޕާޓީގެ ޓީމުތައް ރަށްރަށަށް ޒިޔާރަތް ކުރަން ފަށާނެ ކަމަށް މިނިސްޓަރ ފާހަގަކުރެއްވިއެވެ.
”ޕާޓީގެ ފަރާތުން ޓީމުތައްވެސް ރަށްރަށަށް ޒިޔާރަތް ކުރާނެ. އަދި ކެމްޕޭން ކުރާ ފަރާތްތަކަށްވެސް ބޭނުންވާނެ އިންތިޒާމުތައް ހަމަޖެހިގެން އިރާދަކުރެއްވިއްޔާ ވަރަށް ރަނގަޅަށް ކުރިއަށް ގެންދެވޭނެކަން އަޅުގަނޑު މިފުރުސަތުގައި ފާހަގަކުރަން. އަދި އަޅުގަނޑުމެންގެ މިފަހަރުގެ ޓާގެޓަކީ ހަމަ ވަރަށް ބޮޑު ތަފާތަކުން އިރާދަކުރެއްވިއްޔާ ޕީއެންސީ މި އިންތިޚާބު ކާމިޔާބު ކުރުން،“ އާދަމް ޝަރީފް ވިދާޅުވިއެވެ.
މީގެ އިތުރުން، މި އިންތިޚާބާ އެކު ކުރިއަށްދާ ރިފަރެންޑަމްގެ މަސައްކަތަކީވެސް ޕާޓީން ވަރަށް ބޮޑު އިސްކަމެއް ދީގެން ކުރާނެ މަސައްކަތެއް ކަމަށް މިނިސްޓަރ ވިދާޅުވިއެވެ. އެމަނިކުފާނު ފާހަގަކުރެއްވި ގޮތުގައި މި ރިފަރެންޑަމަކީ ރާއްޖޭގެ ހިންގުމުގެ ނިޒާމަށް، ޚާއްސަކޮށް މުޅި ދައުލަތަށް އަންނާނެ މުހިއްމު ބޮޑު ބަދަލެކެވެ.
އެހެންކަމުން، މި ބަދަލާ ގުޅޭގޮތުން ރައްޔިތުން ހޭލުންތެރިކުރުމާއި، އޭގެ މުހިއްމުކަން ހާމަކޮށްދިނުމުގެ އިތުރުން މުޅި ޤައުމަށް މިކަމުން ހުރި ފައިދާތައް ކިޔައިދިނުމުގެ މަސައްކަތް ކުރިއަށް ގެންދާނެ ކަމަށާއި މި ހުރިހާ މަސައްކަތްތަކެއްވެސް ރަމަޟާން މަހުގެ ތެރޭގައާއި ވޯޓުލުމާ ހަމައަށްވެސް މެދުކެނޑުމެއް ނެތި ކުރިއަށްދާނެ ކަމަށްވެސް އާދަމް ޝަރީފް ވިދާޅުވިއެވެ.
