މަރާމާތުކޮށް ތަރައްޤީކުރުމުގެ މަސައްކަތަށް ބަންދުކޮށްފައި އޮތް ޖުމްހޫރީ މައިދާން އާބާތުރަފިލުވާ ތަރައްޤީކުރުމަށް މިހާރު ކުރިއަށްގެންދާ މަސައްކަތުގެ %90 މަސައްކަތް ނިންމާލުމަށްފަހު އެ ސަރަޙައްދު ވަގުތީގޮތުން ހުޅުވާލައިފިއެވެ.
ޖުމްހޫރީ މައިދާނަށް ބައެއް ބަދަލުތައް ގެނައުމަށް ބަންދުކުރީ މިދިޔަ އޮކްޓޯބަރުމަހުގެ ތެރޭގައެވެ. އެ މަސައްކަތް ސަރުކާރުން ކުރިއަށްގެންދަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާއި ހަވާލުކޮށްގެންނެވެ.
އާބާތުރަ ފިލުވުމުގެ މަސައްކަތާއި ގުޅިގެން އާރުޑީސީން ބުނީ ޖުމްހޫރީ މައިދާން ނުހުޅުވި ލަސްވަނީ، ފްލޯރިންއަށް ރާއްޖެއިން ބޭރުން ގެންނަ ބައެއް ތަކެތި ގެނައުމުގައި އުޅޭ ލަސްތަކެއްގެ ސަބަބުންކަމަށެވެ. ނަމަވެސް އެ ސަރަޙައްދަކީ ގިނައަދަދަކަށް ބަޔަކު ހިތްފަސޭހަކޮށްލުމަށް ރޯދަމަހު ބޭނުންކުރާ މައިޒާނަކަށްވުމުން އެ ސަރަޙައްދު ވަގުތީ ގޮތުން ހުޅުވާލަން ނިންމީކަމަށް އާރުޑީސީން ބުނެފައިވެއެވެ.
މި މަސައްކަތުގައި ޖުމްހޫރީ މައިދާނަށް މުހިންމު ބައެއް ބަދަލުތައް ވަނީ ގެނެސްފައެވެ. އެގޮތުން ޕާކުގެ ކޮންކްރީޓް ތަޅުން ބަދަލުކޮށް، ހިނގާބިނގާވެ އުޅެން ފަސޭހަވާނެހެން ވޯކްވޭތައް ހަދާ ލޭންޑްސްކޭޕިން ވަނީ ރީތިކޮށްފައެވެ. އަދި ކުރީގައި އިށީނުމަށް ހަދާފަހުރި ކޮންކްރީޓް ބުރުތަކުގެ ބަދަލުގައި ލަކުޑީގެ ރީތި ފަރުމާއަކުން ބެންޗްތައް ވަނީ ހަދާފައެވެ. މީގެއިތުރުން ހިޔާކޮށްފައިވާ ބައެއް ބެންޗުތައް ހިމެނޭއިރު، މި ބުރުތަކުގައި ގަސް އިންދާ ފެހިކުރުމުގެ މަސައްކަތްވެސް ދަނީ ކުރަމުންނެވެ.
ޖުމްހޫރީ މައިދާން ސަރަޙައްދު ހުޅުވާލި ނަމަވެސް، ވިނަ ހެއްދުމުގެ މަސައްކަތް ކުރިއަށްދާ ސަރަޙައްދުތައް ވަނީ ބަންދުކޮށްފައެވެ. އަދި އެކަމަށް ސަމާލުވުމަށްވެސް އާރުޑީސީން އިލްތިމާސްކުރައްވައެވެ.
މިދިޔަ 5 އަހަރު ވީރާނާވާން ދޫކޮށްލާފައިވާ މާލޭގައި ހުރި މިފަދަ ޕާކުތަކާއި މައިޒާންތައް، އާބާތުރަ ފިލުވުމުގެ މަސައްކަތް ރައީސް މުޢިއްޒު ފެއްޓެވީ މާލޭގެ މޭޔަރުކަމަށް އެމަނިކުފާނު އިންތިޚާބުވުމާ ހަމައިންނެވެ. އޭރުގެ ސަރުކާރުން ކުރިމަތިވި ގިނަ ގޮންޖެހުންތަކާއިއެކުވެސް މިފަދަ ތަންތަން ތަރައްޤީކުރުމަށް ގިނަގުނަ މަސައްކަތްތަކެއް ކުރެއްވިއެވެ. އޭގެ ފަހުން ރައީސް މުޢިއްޒު ވެރިކަމާއި ހަވާލުވެ ވަޑައިގެންފަހުންވެސް މިފަދަ މައިޒާންތައް ތަރައްޤީކުރުމަށް އެމަނިކުފާނުގެ ސަރުކާރުން ދަނީ ގިނަ މަސައްކަތްތަކެއް ކުރިއަށްގެންދަމުންނެވެ. އެގޮތުން ޖުމްހޫރީ މައިދާނުގެ އިތުރުން ރަސްފަންނާއި ސަލްޓަން ޕާކު ފަދަ މުހިންމު މައިދާންތައް ތަރައްޤީކުރުމުގެ މަސައްކަތްވެސް ބާރު ސްޕީޑުގައި ސަރުކާރުން ދަނީ ކުރަމުންނެވެ.
