ކޮމިޝަނަރ އޮފް ޕޮލިސް އިސްމާޢީލް ނަވީން، ދިވެހި ފުލުހުންގެ ޚިދުމަތުން ރިޓަޔަރ ކުރެއްވުމާ ގުޅިގެން ފުލުހުންގެ އިދާރާ ހިންގުން ވަޤުތީގޮތުން ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއަށް ހޯމް މިނިސްޓަރު ޢަލީ އިޙްސާން ޙަވާލުކުރައްވައިފިއެވެ.
ސީޕީ ނަވީން ދިވެހި ފުލުހުންގެ ޚިދުމަތުން އިއްޔެ ރިޓަޔަރ ކުރެއްވުމުން ދިވެހި ފުލުހުންގެ ޚިދުމަތުގެ ޤާނޫނުގެ 58 ވަނަ މާއްދާގެ (ނ) ގައިވާ ގޮތުގެމަތިން ހޯމް މިނިސްޓަރު ޢަލީ އިޙްސާން ވަނީ ފުލުހުންގެ އިދާރާ ވަޤުތީ ގޮތުން ހިންގާން ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީއަށް ޙަވާލުކުރައްވައިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކޮމިޝަނަރ އޮފް ޕޮލިސްގެ މަޤާމަށް ނަވީން އައްޔަންކުރެއްވީ މިދިޔަ 2025 ވަނަ އަހަރުގެ ޖޫން މަހުގެ ތެރޭގައެވެ. ގާތްގަނޑަކަށް އަށް މަސްދުވަހަށް ފަހު ދިވެހި ފުލުހުންގެ ޚިދުމަތުން ރިޓަޔަރވުމަށް ނަވީން ހުށަހެޅުއްވީ މި މަހުގެ 14 ވީ ހޮނިހިރު ދުވަހުގައެވެ.
ނަވީން ވަނީ މަޤާމުން ރިޓަޔަރ ކުރެއްވިކަންވެސް ޔަޤީންކޮށް ދެއްވައިފައެވެ. އެގޮތުން ފޭސްބުކްގައި އޭނާ ޙިއްޞާކުރެއްވި ސްޓޭޓަސްއެއްގައި ވިދާޅުވީ، މި ފެށުނު ރަމަޟާން މަހާއެކު އޭނާގެ ރިޓަޔަރމެންޓް ވެސް ފެށިފައިވާ ކަމަށެވެ. އެ ސްޓޭޓަސްގައި ނަވީން ވިދާޅުވެފައިވަނީ، ދިވެހި ފުލުހުންގެ ޚިދުމަތުގައި 32 އަހަރުގެ ދިގު މުއްދަތެއް ހޭދަކުރެވިފައިވާ ކަމަށާއި، ޚިދުމަތުން ދުރަށްޖެހިވަޑައިގަންނަވަނީ، ޚިދުމަތާ ގުޅުނުއިރުވެސް ގެންގުޅުއްވި ސިޔާސަތުތަކާއެކުގައި ކަމަށެވެ.
ފުލުހުންގެ މުއައްސަސާއަށް ކުރި އިޚްތިރާމާއި، އިތުބާރާއި ޤައުމަށް އޮތް ލޯތްބަށް އެއްވެސް ބަދަލެއް ނާންނާނެކަން ފާހަގަކުރައްވަމުން ނަވީން ވިދާޅުވީ ގިނަ އަހަރުތަކެއް ވަންދެން ދިވެހި ފުލުހުންގެ ޚިދުމަތުގައި ޤައުމަށް ޚިދުމަތްކުރަން ފުރުޞަތު ލިބިގެން ދިއުމަކީ ލިބިވަޑައިގަތް ޝަރަފެއް ކަމަށެވެ.
ކޮމިޝަނަރ އޮފް ޕޮލިސްގެ މަޤާމަށް ނަވީން އައްޔަންކުރެއްވީ ކުރިން އެ މަގާމުގައި ހުންނެވި ޢަލީ ޝުޖާއު ކުއްލި ގޮތަކަށް މަޤާމުން ވަކިވެވަޑައިގަތުމާ ގުޅިގެންނެވެ.
