އެކްސިޑެންޓްތައް ހިނގުން އިތުރުވުމާ ގުޅިގެން ހުޅުމާލޭ ދެ ފިޔަވަހީގެ ދެމެދުގައި އޮންނަ ކުރެދިމާ ހިނގުމަކީ އެއްކޮޅަށް ދުއްވާ (ވަން-ވޭ) މަގަކަށް ބަދަލުކޮށްފިއެވެ.
އެ މަގު އެއްކޮޅަށް ދުއްވާ މަގަކަށް ބަދަލުކޮށްފައިވަނީ، އެ ސަރަޙައްދުގައި ހިނގާ މަގުމަތީގެ އެކްސިޑެންޓްތައް އިތުރުވަމުންދާތީ، މަގު ބޭނުންކުރާ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ކަމަށް ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ވަނީ މަޢުލޫމާތު ދީފައެވެ.
އެޗްޑީސީން ގެނެސްފައިވާ މި ބަދަލާއެކު އެ މަގުން ދެން ދަތުރުކުރެވޭނީ ހަމައެކަނި ހުޅަނގަށް ދަތުރުކުރެވޭ ގޮތަށް އެއްކޮޅަށެވެ. އެޗްޑީސީގެ މި ނިންމުމާއެކު އެ ސަރަޙައްދުގައި ހިނގާ ނުރައްކާތެރި އެކްސިޑެންޓްތައް ހިނގުން މަދުކުރެވިގެންދާނެ ކަމަށް އެ ކޯޕަރޭޝަނުން ދެކެއެވެ.
ހުޅުމާލޭގެ މަގުތަކަކީ މަގުތައް ބޭނުންކުރާ ފަރާތްތަކަށް ރައްކާތެރި މަގުތަކެއްކަން ކަށަވަރުކުރުމަށްޓަކައި މީގެ ކުރިންވެސް އެޗްޑީސީން ހަރުދަނާ ފިޔަވަޅުތަކެއް އަޅާފައިވެއެވެ. އެގޮތުން، ހުޅުމާލޭގެ ބޮޑެތި މަގުތަކުގައި އެކްސިޑެންޓްތައް ހިނގުން އިތުރުވުމާއި ގުޅިގެން ސްޕީޑް ބްރޭކަރުތަކެއްވެސް ހަރުކުރިއެވެ.
ނަމަވެސް، އެ ސްޕީޑް ބްރޭކަރުތަކުގެ ސަބަބުން ދުއްވާ މީހުންނަށާއި އުޅަނދުތަކަށް އެކި ގޮތްގޮތުން ގެއްލުންވާ ކަމަށް ބުނެ އާންމުންގެ ފާޑުކިޔުންތައް އަމާޒުވުމާއި ގުޅިގެން ސްޕީޑް ބްރޭކަރުތައް ފަހުން ވަނީ އެ މަގުތަކުން ނަގައިފައެވެ.
