ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލޭ ދެވަނަ ފިޔަވަހީގެ ހިޔާ ސަރަޙައްދުގައި ތަރައްޤީކުރި އައުޓްޑޯރ ޖިމްގެ މަސައްކަތްތައް އެއްކޮށް ނިންމައި ރަސްމީކޮށް ހުޅުވައިފިއެވެ.
މި ޖިމް ރަސްމީކޮށް ހުޅުވައިދެއްވީ އެކަމަށްޓަކައި މިއަދު ހަވީރު އެ ސަރަޙައްދުގައި ބޭއްވި ޙާއްޞަ ރަސްމިއްޔާތެއްގައި އެޗްޑީސީގެ މެނޭޖިންގ ޑިރެކްޓަރު ބްރިގޭޑިއާ ޖެނެރަލް ރިޓަޔަރޑް ޢަލީ ޒުހައިރެވެ. މި ޖިމް ހުޅުވުމާއި ގުޅިގެން އެޗްޑީސީން އެކްސްގައި ޙިއްޞާކޮށްފައިވާ ޕޯސްޓެއްގައި ބުނެފައިވަނީ، މި ޖިމް ވެގެންދާނީ ދެވަނަ ފިޔަވަހީގައި ދިރިއުޅޭ ރައްޔިތުންނަށް ދުޅަހެޔޮ ދިރިއުޅުމެއް ބިނާކުރުމަށް މަގުފަހިވެގެންދާނެ މާހައުލަކަށް ކަމަށެވެ.
މި ޖިމުގައި ކަސްރަތު ކުރުމަށް ބޭނުންކުރާ 22 ބާވަތެއްގެ އައުޓްޑޯރ އިކުއިޕްމެންޓް ވަނީ ބަހައްޓައިފައެވެ. މި މަޝްރޫއަކީ ދުޅަހެޔޮ މުޖުތަމައެއް ބިނާކުރުމުގެ ގޮތުން އެޗްޑީސީން ކުރިއަށްގެންދިޔަ މަޝްރޫއެކެވެ.
ނެޝަނަލް ފިޓްނަސް ޕްލޭނާ އެއްގޮތަށް، ރާއްޖޭގެ މީހުން ދިރިއުޅޭ ހުރިހާ ރަށެއްގައި އައުޓްޑޯ ޖިމް ގާއިމްކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ.
