ދ. މީދޫގައި ބޭއްވި ރަސްމިއްޔާތެއްގައި މި ޚިދުމަތް ރަސްމީކޮށް ފައްޓަވައިދެއްވީ ޓްރާންސްޕޯރޓް މިނިސްޓަރު މުޙައްމަދު އަމީންއެވެ. ދ. އަތޮޅުގައި މި ޚިދުމަތް ފެށިގެންދިއުމުން މިއީ އެ ކުންފުނިން މި ހިދުމަތް ދޭން ފެށި 13 ވަނަ އަތޮޅަށް ވެގެންދާނެއެވެ. ފާހަގަކޮށްލެވޭ ގޮތުގައި، މި ޚިދުމަތް ފަށާ ފުރަތަމަ ހަފްތާގައި ދަތުރުތައް ކުރިއަށްގެންދާނީ އެއްވެސް އަގެއް ނެގުމެއްނެތިއެވެ. އެއީ މި ނިޒާމަށް ޢާންމުން އަހުލުވެރިކުރުވުމުގެ ގޮތުންނެވެ.
ދަތުރުތަކަށް އަގު ނަގަން ފަށާނީ މި މަހުގެ 25 ވަނަ ދުވަހުން ފެށިގެންނެވެ.
މި ރަސްމިޔާތުގައި ވާހަކަދައްކަވަމުން މިނިސްޓަރު އަމީން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެލެއްވި ގޮތަށް ކުރިއަށް އޮތް ހަ މަސްދުވަހުގެ ތެރޭގައި ހައި ސްޕީޑް ފެރީގެ ނިޒާމަކުން މުޅި ރާއްޖެ އެއްކޮށް ގުޅައި ނިންމާލެވޭނެ ކަމަށެވެ. މީގެ އިތުރުން މި ސަރުކާރުން މަސައްކަތް ކުރަނީ ހަމައެކަނި ދަތުރުފަތުރުގެ ނިޒާމެއް ޤާއިމުކުރަން ނޫންކަން ފާހަގަކުރައްވަމުން މިނިސްޓަރު ވިދާޅުވީ، ބައިނަލްއަޤުވާމީ މިންގަނޑުތަކަށް ފެތޭ ރައްކާތެރި އިތުބާރުހުރި ދަތުރުފަތުރުގެ ސަޤާފަތެއް ޤާއިމުކުރުމަކީ ސަރުކާރުގެ އަމާޒެއް ކަމަށެވެ.
މިނިސްޓަރު އަމީން އިތުރަށް ވިދާޅުވީ، ދިވެހިރާއްޖޭގެ ޖަޒީރާ ކަނޑުތަކަކީ އެއް ބަަޔަކު އަނެއް ބަޔަކާ ވަކިކުރާ ހުރަހަކަށް ވެގެންނުވާނެ ކަމަށާއި އެހެންނަމަވެސް ވާންޖެހޭނީ ގުޅުވައިދޭ މަގުތަކަކަށް ކަމަށެވެ. މިނިސްޓަރު އަމީން ވަނީ މިކަމާ ގުޅިގެން އެކްސްގައި ވެސް ޕޯސްޓެއް ޙިއްޞާކުރައްވައިފައެވެ. އެ ޕޯސްޓުގައި މިނިސްޓަރު ވިދާޅުވީ، މިއަދަކީ މުޅި ނިލަންދެ އަތޮޅުގެ ރައްޔިތުންނަށް އުފާވެރި ދުވަހެއް ކަމަށެވެ.
މި އަދަކީ މުޅި ނިލަންދެ އަތޮޅުގެ (ދ. އަދި ފ.) ރައްޔިތުންނަށް އުފާވެރި ދުވަހެއް.. ރައީސުލްޖުމްހޫރިއްޔާ @MMuizzu ގެ ތަސައްވުރާ އެއްގޮތަށް، މި ދެ އަތޮޅުގައި ހައި ސްޕީޑް ފެރީގެ ޚިދުމަތް މިވަނީ އިފްތިތާހުކުރެވިފައި..
މި ޚިދުމަތާއެކު،އަޅުގަނޑުމެންގެ އަމާޒަކީ ރައްކާތެރި، އިތުބާރު ހުރި… pic.twitter.com/R0Vw44a7cS
— Mohamed Ameen (@ameen3d) February 17, 2026
އެ ދެ އަތޮޅުގެ ރައްޔިތުންނަށް މިއަދު އުފާވެރި ދުވަހަކަށް ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރާ އެއްގޮތަށް، މި ދެ އަތޮޅުގައި ހައި ސްޕީޑް ފެރީގެ ޚިދުމަތް އިފުތިތާހުކުރެވިފައިވާތީ ކަމަށެވެ. މި ޚިދުމަތާއެކު ރައްކާތެރި، އިތުބާރު ހުރި ކަނޑުދަތުރުފަތުރުގެ ނިޒާމެއް މުޅި ރާއްޖޭގައި ބިނާކުރުމަކީ އަމާޒެއް ކަމަށް މިނިސްޓަރު ވަނީ އިތުރަށް ވިދާޅުވެފައެވެ.
